Брюссель. 12 мамыр. ИНТЕРФАКС — Еурокомиссия (ЕК) Еуропадағы ауғандық мигранттар мәселесін талқылау мақсатында «Талибан» қозғалысының өкілдерін кездесуге шақырды. Бұл туралы Еурокомиссияның ресми өкілі Маркус Ламмерт мәлімдеді.
«Еурокомиссияның көші-қон және ішкі істер жөніндегі бас дирекциясы мен Швецияның Ішкі істер министрлігі Ауғанстанның іс жүзіндегі билігіне хат жолдағанын растаймын. Онда Брюссельде техникалық деңгейдегі кеңес өткізу мүмкіндігін қарастыру ұсынылған», — деді баспасөз хатшысы сейсенбі күні өткен брифингте.
Оның нақтылауынша, бұл кездесу биылғы қаңтарда Ауғанстанда өткен алғашқы басқосудың жалғасы болуы тиіс. Бұл бастамаға өткен жылдың қазан айында ЕО-ға мүше 20 мемлекет пен Шенген аймағына кіретін елдер мүдделілік танытып, Еурокомиссиядан ауғандықтарды отанына қайтару бойынша техникалық күш-жігерді үйлестіруді сұраған.
Ламмерт бұл мәселенің ең алдымен «Еуропалық Одақ аумағында қалуға құқығы жоқ және қауіпсіздікке қатер төндіретін» тұлғаларды қайтаруға қатысты екенін баса айтты.
«Сөз қауіпсіздікке қатер төндіретін адамдар туралы болып отыр», — деп қайталады ол.
Еурокомиссия өкілінің айтуынша, «Талибанмен» техникалық байланыс орнату — бұл ЕК жүзеге асырып жатқан үйлестіру жұмыстарының бір бөлігі. Сонымен қатар, ол бұл хатты жолдау Ауғанстанның қазіргі билігін мойындауды білдірмейтінін қадап айтты.
Бұл қадам Еуропалық кеңестің 2021 жылғы нұсқауларына сәйкес келеді және ауған халқына қолдау көрсетуді жалғастыру мақсатын көздейді.
Сондай-ақ, Ламмерт сөз болып отырған тұлғалардың ЕО елдерінен баспана сұрап, ресми түрде бас тарту алған азаматтар екенін түсіндірді. Олардың кандидатураларын қарау нәтижесінде құзыретті қызметтер теріс баға берген. Мұндай шешімдерді мүше мемлекеттер дербес қабылдайды, ал Еурокомиссия бұл процеске араласпайды.
Талибтердің Брюссельге сапарын ұйымдастырудың егжей-тегжейіне қатысты сауалға өкіл: «Әзірге бұл туралы айту ерте. Біз бұл кездесуді Брюссельде ұйымдастыру қаншалықты мүмкін екенін анықтау үшін тек «барлау» жұмыстарын жүргізіп жатырмыз», — деп жауап берді.
