Астана. 12 мамыр. ИНТЕРФАКС-ҚАЗАҚСТАН — Қазақстанның негізгі күріш өсіретін аймағы — Қызылорда облысы суармалы су лимитінің төмендеуіне байланысты биыл күріш егістігін азайтады. Бұл туралы облыс әкімі Мұрат Ергешбаев мәлімдеді.
«Биыл күріш алқабы өткен жылмен салыстырғанда 10,9 мың гектарға қысқарып, 70 мың гектарды құрайды», — деді М. Ергешбаев сейсенбі күні өткен Үкімет отырысында.
Осылайша, күріш егісі 13,5%-ға азайып отыр. Әкімнің мәліметінше, соңғы төрт жылда облыстағы күріш алқаптарының жалпы аумағы 19 мың гектарға немесе 21%-ға қысқарған.
М. Ергешбаев биылғы вегетациялық кезеңге арналған суармалы су лимиті 3 млрд текше метр көлемінде бекітілгенін атап өтті. Бұл өткен жылмен салыстырғанда 650 млн текше метрге аз.
«Осы лимитке сәйкес, облыста барлығы 185,8 мың гектар жерге ауыл шаруашылығы дақылдарын егу жоспарланып отыр», — деді аймақ басшысы.
Оның айтуынша, егіс алқаптарын әртараптандыру мақсатында күріштің орнына суды аз қажет ететін дақылдар егіледі. Соның ішінде 15 мың гектар аумаққа жүгері орналастырылады.
