Астана. 12 мамыр. ИНТЕРФАКС-ҚАЗАҚСТАН — Қазақстанда бұршақ және майлы дақылдар өндірісінің күрт артуына байланысты өнімді бөлек сақтау мәселесі өзекті болып отыр. Бұл туралы Ауыл шаруашылығы вице-министрі Азат Сұлтанов мәлімдеді.
«Егіс алқаптарын әртараптандыру нәтижесінде бұршақ және майлы дақылдардың өнімі айтарлықтай өсті. Соған байланысты әр дақылды өзара араластырмай, бөлек сақтау қажеттілігі туындап отыр», — деді А. Сұлтанов сейсенбі күні өткен Үкімет отырысында.
Вице-министрдің айтуынша, биылғы сәуір айынан бастап элеваторлар салу мен оларды жаңғыртуды жеңілдікпен қаржыландыруға өтінімдер қабылдана бастады. Сонымен қатар, арнайы «жол картасы» әзірленіп, онда астық сақтау нысандарын салудың негізгі критерийлері мен индикаторлары айқындалған.
«Қаржыландыру мәселесі толық шешілсе, элеваторлардың сыйымдылығын 1 млн тоннаға дейін ұлғайту жоспарланған. Бұл бастамаға қолдау көрсетулеріңізді сұраймын», — деді Сұлтанов.
Еске сала кетейік, 2025 жылы Қазақстанда бұршақ дақылдарының рекордтық өнімі жиналып, 1,1 млн тоннадан асты. Сондай-ақ, 4,8 млн тонна майлы дақылдар жиналып, бұл да ең жоғары көрсеткіш ретінде тіркелді.
