Астана. 12 мамыр. ИНТЕРФАКС-ҚАЗАҚСТАН — Ауыл шаруашылығы вице-министрі Азат Сұлтанов Қазақстанның барлық өңірінде егіс науқаны басталғанын мәлімдеді.
«Бүгінгі таңда егіс жұмыстары барлық дерлік аймақта қолға алынды. Қазіргі уақытта 4,5 млн гектар жерге дән себілді. Оның ішінде дәнді дақылдар шамамен 2 млн гектарды, майлы дақылдар — 1 млн гектардан астам, мал азығы дақылдары — 388 мың гектар, көкөніс-бақша дақылдары мен картоп — 206,3 мың гектар, ал мақта — 154 мың гектар аумақты қамтыды», — деді А. Сұлтанов сейсенбі күні өткен Үкімет отырысында.
Вице-министр қазіргі уақытта егіс жұмыстарының қарқыны жақсы екенін атап өтті.
«Ендігі кезекте осы қарқынды бәсеңдетпей, егісті тиісті агротехникалық мерзімде аяқтау қажет. Көктемгі егіс науқанының барысы министрліктің тікелей бақылауында. Әкімдіктер барлық агротехникалық іс-шаралардың: егіс мерзімінен бастап, тыңайтқыштар енгізу, шегірткелермен күрес және басқа да қажетті жұмыстардың уақтылы әрі сапалы жүргізілуіне ерекше көңіл бөлуі тиіс», — деді Сұлтанов.
