Астана. 13 мамыр. ИНТЕРФАКС-ҚАЗАҚСТАН – Премьер-министрдің орынбасары – ұлттық экономика министрі Серік Жұманғарин Парсы шығанағындағы қақтығыс пен есеп айырысу мәселелерінің сақталуына байланысты 2026 жылы Қазақстан мен Иран арасындағы тауар айналымы баяулайды деп күтетінін мәлімдеді.
«Иранмен тауар айналымы шамамен 450 млн доллар деңгейінде болды деп соңғы рет 2025 жылдың қорытындысы бойынша айтқан едім. Ал 2026 жылдың қорытындысы бойынша, әрине, қазір Парсы шығанағында болып жатқан қақтығысқа байланысты баяулау болады», – деді Жұманғарин сәрсенбі күні Мәжіліс кулуарында.
Оның айтуынша, екі ел арасындағы тауар айналымын 3 млрд долларға жеткізу міндеті әзірге қиын болып отыр.
Жұманғариннің мәліметінше, жасалған келісімшарттар іс жүзінде уақытша тоқтап қалған, өйткені трейдерлер төлем жүргізуге байланысты тәуекелдерден қауіптенуде.
«Келісімшарттар жасалған. Бірақ менің білуімше, трейдерлер күту режиміне өтті. Неге? Себебі төлемге қатысты тәуекелдер бар. Иранмен жұмыс істеудегі ең үлкен мәселе әрдайым төлем мәселесі болатын, өйткені есеп айырысу көбіне үшінші елдер арқылы жүргізілетін», – деп түсіндірді ол.
Сонымен қатар вице-премьердің айтуынша, азық-түлікке жатпайтын кейбір тауарларды жеткізуге қатысты шектеулер де сақталып отыр.
«Non-food тауарларына қатысты санкциялық мәселелер бар. Бізге мұндай тауарларды жеткізуге мүмкіндік беру жөнінде өтініш жасадық, алайда әзірге бұл бағытта айтарлықтай ілгерілеу жоқ», – деді Жұманғарин.
2023 жылдың соңында Қазақстан мен Иран өзара тауар айналымын 3 млрд долларға дейін жеткізуді мақсат еткен болатын. Алайда 2025 жылы Астана мен Тегеран сауда көлемі бойынша жоспарланған көрсеткіштерді қайта қарап, алғашқы кезеңде 1 млрд долларға, кейінгі кезеңде 2 млрд долларға дейін төмендетті.
2024 жылы екі ел арасындағы өзара сауда көлемі 340 млн доллардан асты.
