Астана. 13 мамыр. ИНТЕРФАКС-ҚАЗАҚСТАН – Мұнай өндіру көлемінің төмендеуіне қарамастан, Қазақстан тұрақты экономикалық өсімді сақтап отыр. Өсімнің негізгі драйверлері өңдеу өнеркәсібі, құрылыс және сауда салалары болып отыр. Бұл туралы вице-премьер – ұлттық экономика министрі Серік Жұманғарин мәлімдеді.
«Төрт айдың қорытындысы бойынша экономиканың өсімі 3,6 пайыз болды. Бұл ретте осы кезеңде біз шамамен 5 млн тонна мұнай өндіре алмадық. Егер осы көлем экономикаға қосымша түскенде, өсім көрсеткіші 6 пайыздан асып кетер еді», – деді Жұманғарин сәрсенбі күні Мәжіліс кулуарында.
Оның айтуынша, қазіргі динамика шикізаттық емес сектордың өсіп келе жатқанын көрсетеді.
«Қазақстан экономикасы қазір шикізаттық тәуелділіксіз де өсім көрсете алатынын дәлелдеп отыр. Шикізаттық емес сектор тұрақты түрде дамып келеді», – деді министр.
Жұманғариннің сөзінше, өсімнің негізгі қозғаушы күштері ретінде өңдеу өнеркәсібі, құрылыс және сауда салалары қалып отыр.
«Өңдеу өнеркәсібі шамамен 10 пайыз өсім беріп отыр және ай сайын бұл көрсеткіш артып келеді. Құрылыс өсіп жатыр, сауда да дамуда», – деп толықтырды вице-премьер.
2025 жылы Қазақстанның жалпы ішкі өнімі 6,5 пайызға өскен. Ал 2026 жылдың қаңтар–сәуір айларында өсім 3,6 пайызды құрады. Премьер-министр Олжас Бектенов 2026 жылы экономиканың тұрақты өсімін 5 пайыздан жоғары деңгейде қамтамасыз етуді тапсырған болатын.
