***Онлайн-платформаларда кандидаттарға тең емес жағдай жасағаны үшін айыппұл енгізіледі
Астана. 13 мамыр. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күнгі жалпы отырыста «Сайлау мәселелерін жетілдіру бойынша кейбір заңнамалық актілерге өзгерістер мен толықтырулар енгізу туралы» заң жобасын бірінші оқылымда мақұлдады.
Ұлттық экономика министрі, премьер-министрдің орынбасары Серік Жұманғариннің айтуынша, құжатта сайлау өткізу кезінде онлайн-платформаларды пайдалану тәртібін реттейтін және барлық үміткерлерге тең жағдай жасауды қамтамасыз ететін нормалар қарастырылған.
«Үміткерлер мен саяси партиялардың сайлау қорларынан бөлінетін қаржыландырудан өзге қандай да бір материалдық көмекті тартуға тыйым салынады. Сайлау қорларынан тыс қаржылай немесе өзге де материалдық көмек алғаны үшін жеке тұлғаларға 25 айлық есептік көрсеткіш, ал заңды тұлғаларға 55 айлық есептік көрсеткіш көлемінде әкімшілік жауапкершілік белгіленеді», – деді ол.
Сонымен қатар үміткерлерге сайлауалды үгіт-насихат жүргізуге бөлінген мемлекеттік бюджет қаражатын жұмсау тәртібін бұзғаны үшін жауапкершілік күшейтіледі.
Аталған құқықбұзушылықтар үшін әкімшілік айыппұл мөлшері 5 АЕК-тен 25 АЕК-ке дейін ұлғайтылды. Жұманғариннің айтуынша, бұл бюджет қаражатының мақсатты әрі ашық пайдаланылуына ықпал етеді.
Мәжіліс сондай-ақ «Әкімшілік құқықбұзушылық туралы» кодекске өзгерістер мен толықтырулар енгізу туралы ілеспе заң жобасын да бірінші оқылымда мақұлдады. Құжатта онлайн-платформаларда үгіт материалдарын орналастырудан бас тартқаны және үміткерлерге тең емес жағдай жасағаны үшін жеке тұлғаларға 20 АЕК, ал заңды тұлғаларға 50 АЕК көлемінде әкімшілік жауапкершілік қарастырылған.
«Жалпы, ұсынылып отырған шаралар адал бәсекелестікті қамтамасыз етуге және сайлау процесіне қатысушылардың барлығына ортақ әрі түсінікті ережелер қалыптастыруға бағытталған», – деп түйіндеді Жұманғарин.
Қазақстанда 1 айлық есептік көрсеткіш 4325 теңгені құрайды. Қазіргі бағам бойынша 1 АҚШ доллары – 463,91 теңге.
