Астана. 14 мамыр. ИНТЕРФАКС-ҚАЗАҚСТАН — Қазақстан парламентінің сенаты бейсенбі күнгі жалпы отырыста «Еңбек заңнамасын жетілдіру мәселелері бойынша кейбір заңнамалық актілерге өзгерістер мен толықтырулар енгізу туралы» заңды екі оқылымда қарап, мақұлдады.
Бұған дейін заң жобасын мәжіліс қабылдаған болатын. Осылайша құжат парламент тарапынан толық қабылданып, президенттің қол қоюына жіберіледі.
Сенаттың әлеуметтік-мәдени даму және ғылым комитетінің қорытындысында заңның мақсаты қызметкерлердің құқықтарын қорғау кепілдіктерін күшейту, әлеуметтік әріптестікті дамыту, еңбек қауіпсіздігі стандарттарын арттыру және еңбек қатынастарына қатысты негізгі рәсімдерді нақтылау екені айтылған.
Құжат аясында Еңбек кодексіне, «Халық денсаулығы және денсаулық сақтау жүйесі туралы» кодекске және «Қазақстан Республикасындағы жергілікті мемлекеттік басқару және өзін-өзі басқару туралы» заңға өзгерістер мен толықтырулар енгізіледі.
Еңбек кодексі қызметкердің соңғы жұмыс күні уақытша еңбекке жарамсыздық кезеңімен немесе әлеуметтік демалыспен сәйкес келген жағдайдағы тәртіпті нақтылайтын нормалармен толықтырылады.
Сондай-ақ ауысым алдындағы медициналық тексеруден өтуге кеткен уақытқа ақы төлеу қарастырылған. Оның мөлшері ұжымдық шартпен немесе жұмыс берушінің актісімен белгіленеді.
Бұдан бөлек, жұмыс беруші еңбек жағдайлары өзгергені туралы қызметкерді жазбаша түрде хабардар етуге міндеттеледі. Материалдық жауапкершілігі бар қызметкерлердің еңбек шартын өз бастамасымен бұзу тәртібі, сондай-ақ жұмыс берушінің мүлкі мен құжаттарын қабылдап-тапсыру рәсімін аяқтау шарттары да реттеледі.
«Халық денсаулығы және денсаулық сақтау жүйесі туралы» кодекске қызметкер тіркелген медициналық ұйымға цифрлық технологиялар арқылы скринингтік тексерулерден өту қажеттігі туралы хабарлау құзыретін беретін нормалар енгізіледі.
Ал «Қазақстан Республикасындағы жергілікті мемлекеттік басқару және өзін-өзі басқару туралы» заңға жергілікті атқарушы органдардың еңбек, еңбек қауіпсіздігі және еңбекті қорғау саласындағы мемлекеттік саясаттың іске асырылуын қамтамасыз ету міндетін бекітетін толықтырулар енгізіледі.
Сонымен қатар заң жұмыс берушілерге өндіріс процесінде пайдаланылатын ғимараттар, жабдықтар, көлік құралдары және өзге де еңбек құралдарын қолданыстағы қауіпсіздік талаптарына сәйкестендіру міндетін жүктейді.
