Астана. 14 мамыр. ИНТЕРФАКС-ҚАЗАҚСТАН — Қазақстан парламенті сенаты бейсенбі күнгі жалпы отырыста «Қазақстан Республикасының мемлекеттік наградалары туралы» заңға өзгерістер мен толықтыру енгізу жөніндегі заңды мақұлдады.
Бұған дейін заң жобасын мәжіліс қабылдаған болатын. Осылайша құжат парламент тарапынан толық қабылданып, президенттің қол қоюына жіберіледі.
Заң аясында «Әл-Фараби», «Қожа Ахмет Ясауи» және «Мейірім» ордендерін тағайындау, сондай-ақ ордендер мен медальдармен марапаттау тәртібін өзгерту қарастырылған.
Сенаттың әлеуметтік-мәдени даму және ғылым комитетінің қорытындысында бір адамға бірдей құрметті атақты қайтадан беруге жол берілмейтіні көрсетілген.
«Әл-Фараби» орденімен білім, ғылым, мәдениет және рухани өмір салаларында елеулі жетістікке жеткен азаматтар марапатталады.
«Қожа Ахмет Ясауи» ордені отандық және шетелдік ғалымдарға, мемлекет және қоғам қайраткерлеріне, сондай-ақ мемлекеттілікті нығайтуға және қоғамдық-саяси, әлеуметтік, мәдени-гуманитарлық салалардың дамуына үлес қосқан азаматтарға табысталады.
Ал «Мейірім» ордені қайырымдылық, меценаттық және филантропиялық қызметке елеулі үлес қосқан азаматтарды марапаттауға арналған.
Бұған дейін хабарланғандай, осы жылдың сәуір айында президент Қасым-Жомарт Тоқаев ғалымдармен кездесуде философ Әл-Фарабидің есімімен аталатын жаңа орден тағайындау бастамасын көтерген болатын.
Президенттің айтуынша, бұл жоғары марапат білім мен ғылым, мәдениет және рухани өмір салаларында айрықша жетістікке жеткен азаматтарға беріледі. Сондай-ақ ол биыл қазан айында Республика күні қарсаңында «Мейірім», «Қожа Ахмет Ясауи» және «Әл-Фараби» ордендері алғаш рет табысталатынын мәлімдеген.
