Астана. 15 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев БҰҰ Дүниежүзілік метеорологиялық ұйымының басшысы, БАӘ Ұлттық метеорология орталығының бас директоры Абдулла Әл-Мандуспен климаттық күн тәртібін талқылады, деп хабарлады Мемлекет басшысының баспасөз қызметі.
«Сұхбаттасушылар Қазақстан үшін стратегиялық маңызы бар климаттық күн тәртібі мәселелеріне ерекше назар аударды. Атап айтқанда, ерте ескерту жүйелерін дамытудың, метеорологиялық инфрақұрылымды жаңғыртудың, сондай-ақ ғылыми деректермен алмасуды кеңейтудің маңыздылығы атап өтілді», — делінген жұма күні таралған хабарламада.
Өңірлік және жаһандық деңгейде су қауіпсіздігі мен су ресурстарын басқару мәселелерін шешудің өзектілігіне басымдық берілді. Осы тұрғыда Қазақстанның БҰҰ аясында Халықаралық су ұйымын құру туралы бастамасының маңызы айтылды.
Қазіргі уақытта Қазақстанның Түркістан облысында БАӘ Ұлттық метеорология орталығымен бірлесіп, су қоймаларын толтыру деңгейін арттыру және ауыл шаруашылығы алқаптарын су ресурстарымен қамтамасыз ету мақсатында жауын-шашынды қолдан шақыру жобасы іске асырылуда. Жобаны толық ауқымда іске қосу 2026 жылғы 17 мамырға жоспарланған.
Қазақстан өңірде жасанды жаңбыр технологияларын практикалық қолдануға көшкен алғашқы мемлекет болды.
