Астана. 15 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Түркі мемлекеттері ұйымының (ТМҰ) бейресми саммитіне қатысу үшін Түркістан қаласына келді, деп хабарлады Мемлекет басшысының баспасөз қызметі.
Жұма күні Түркістанда «Жасанды интеллект және цифрлық даму» тақырыбында ТМҰ саммиті өтеді. Іс-шара барысында сауда-экономикалық, инвестициялық, көлік-коммуникациялық және экологиялық салалардағы, сондай-ақ цифрлық инфрақұрылымды дамыту, инновациялық технологияларды енгізу және жасанды интеллектіні практикалық қолдану бағытындағы көпжақты ынтымақтастықты одан әрі кеңейту мәселелері талқыланады. Делегация басшылары халықаралық және өңірлік күн тәртібіндегі өзекті мәселелерді де қарастырады.
Жиын қорытындысы бойынша Түркістан декларациясын қабылдау көзделуде.
ТМҰ құрамына Әзербайжан, Қазақстан, Қырғызстан, Өзбекстан және Түркия кіреді. Мажарстан мен Түрікменстан бақылаушы мәртебесіне ие. Ұйымның штаб-пәтері Стамбул қаласында орналасқан.
