Астана. 15 мамыр. ИНТЕРФАКС-ҚАЗАҚСТАН – Жұма күні өткен бірлескен отырыста Қазақстан Парламенті Сенаты мен Мәжілісінің депутаттары «Қазақстан Республикасының әкімшілік-аумақтық құрылымы туралы» конституциялық заң жобасын қарап, бірінші оқылымда мақұлдады.
Ұлттық экономика вице-министрі Бауыржан Омарбеков заң жобасын таныстыра отырып, құжаттың жаңа Конституция талаптарына сәйкес әзірленгенін атап өтті.
«Бұрын қалыптасқан құқықтық жүйенің сабақтастығы сақталып, мемлекеттің тұтастығы мен тұрақтылығы қағидаты қамтамасыз етіледі. Құжатқа әкімшілік-аумақтық бірліктерді айқындауға, оларды құру, қайта ұйымдастыру және тарату тәртібін реттеуге, сондай-ақ мемлекеттік органдардың өкілеттіктерін белгілеуге қатысты нормалар енгізілді», — деді ол.
Заң жобасында Мемлекет басшысы, Үкімет және мемлекеттік басқару органдары арасындағы өкілеттіктерді аражікпен бөлу көзделген. Атап айтқанда, Президент облыстар мен аудандарды құрады және таратады, елді мекендерді республикалық, облыстық және аудандық маңызы бар қалалар санатына жатқызады. Үкімет Президенттің қарауына облыстар мен аудандарды құру және тарату, елді мекендерді тиісті санаттарға жатқызу және әкімшілік-аумақтық құрылымның өзге де мәселелері бойынша ұсыныстар енгізеді.
Сондай-ақ Үкіметтің құзыретіне астананың, облыстардың және республикалық маңызы бар қалалардың шекараларын белгілеу мен өзгерту және басқа да өкілеттіктер жатады.
Бұдан бөлек, әкімшілік-аумақтық құрылым мәселелерін шешудегі жергілікті өкілді және атқарушы органдардың құзыреттері айқындалды. Оларға елді мекендерді кенттер мен ауылдар санаттарына жатқызу, облыс пен аудан шегінде олардың әкімшілік бағыныстылығын анықтау, шекараларды бекіту мен өзгерту және басқа да мәселелер жатқызылған.
Заң жобасында қала, ауыл және кент мәртебесіне қатысты нақты талаптар қарастырылған. Омарбековтың айтуынша, бұл норма елді мекендер мәртебесінің негізсіз өзгертілуіне жол бермейді; мұндай процедура тек әлеуметтік-экономикалық даму көрсеткіштері мен тұрғындардың пікірі негізінде белгіленген уақыт кезеңі ішінде жүзеге асырылады.
Жалпы алғанда, заң жобасы елдің аумақтық тұтастығын нығайтуға және мемлекеттік басқарудың тиімділігін арттыруға бағытталған.
