Астана. 15 мамыр. ИНТЕРФАКС-ҚАЗАҚСТАН – Жұма күні өткен бірлескен отырыста Қазақстан Парламентінің Сенаты мен Мәжілісі «Астана мәртебесі туралы» конституциялық заң жобасын қарап, бірінші оқылымда қабылдады.
«Астананың қарқынды дамуы, халық санының тұрақты өсуі, соның ішінде урбанизация процестерінің күшеюі құқықтық және басқару тетіктерін одан әрі жетілдіруді талап етеді. Осыған байланысты «Астана мәртебесі туралы» конституциялық заң жобасы әзірленді», — деді отырыста Ұлттық экономика вице-министрі Бауыржан Омарбеков.
Құжаттың мақсаты мен міндеттері — астананың ерекше мәртебесін айқындау, мемлекеттік басқару тиімділігін арттыру және тұрғындар үшін жайлы әрі қауіпсіз қалалық орта қалыптастыру. Заң жобасында астана мәслихаты мен әкімдігінің өкілеттіктері нақтыланып, жүйеленген, деп атап өтті ол.
Атап айтқанда, астана мәслихаты мен әкімдігіне сәулет және қала құрылысы, жол жүрісі, халықты әлеуметтік қорғау, экология, туризм, коммуналдық меншік салаларындағы негізгі құзыреттер беріледі.
Бұл ретте астананың қала маңындағы аймағының шекарасы мен мөлшері, сондай-ақ оны пайдалану тәртібі қала мен облыс мәслихаттары мен әкімдіктерінің бірлескен ұсынысы негізінде Үкіметпен айқындалады.
Көлік инфрақұрылымын басқару, жол жүрісін және қаланың тұрақ кеңістігін ұйымдастыру функцияларын жол жүрісін ұйымдастыру орталығы жүзеге асыратын болады.
«Астананың орман-саябақ аймағы — бұл қала аумағындағы қорғаныштық, сауықтыру және рекреациялық функцияларды атқаратын жерлер. Оның шекараларын белгілеу мен өзгертуді астана әкімдігінің ұсынысы бойынша Үкімет жүзеге асырады. Орман-саябақ аймағының экологиялық жағдайына теріс әсер ететін кез келген қызметке тыйым салу көзделеді», — деп хабарлады Омарбеков.
Сонымен қатар, заң жобасында астананың бірыңғай сәулеттік келбетін қалыптастыруға ерекше көңіл бөлінген.
Дизайн-код талаптары ғимараттарға, жол желісіне, жарнамалық және сыртқы безендіру элементтеріне қолданылады. Құрылыс, реконструкциялау және абаттандыру жұмыстары белгіленген талаптарға сәйкес жүргізіледі.
Аталған мәселелерді үйлестіру үшін сәулет-қала құрылысы кеңесі құрылады.
Тұтастай алғанда, Омарбеков түйіндегендей, конституциялық заң жобасы астананың елдің саяси, әкімшілік және экономикалық орталығы ретіндегі ерекше рөлін бекітуге мүмкіндік береді.
