Астана. 21 мамыр. ИНТЕРФАКС-ҚАЗАҚСТАН — Қазақстан Республикасының Парламенті Мәжілісі бейсенбі күнгі жалпы отырыста «Қазақстан Республикасының кейбір заңнамалық актілеріне әскери қызметшілердің құқықтық жағдайын, қорғаныс пен әскери қызметті жетілдіру мәселелері бойынша өзгерістер мен толықтырулар енгізу туралы» заң жобасын бірінші оқылымда қарап, мақұлдады.
Мәжіліс депутаты Олжас Құспековтің айтуынша, заң жобасы әскери қызметшілерді әлеуметтік және құқықтық тұрғыдан қолдауды күшейтуге бағытталған.
Құжатқа сәйкес, казармалық жағдайда орналасқан немесе карантиндік іс-шараларға тартылған әскери қызметшілер мемлекет есебінен толыққанды тамақпен қамтамасыз етіледі.
Сондай-ақ депутаттар Төтенше жағдайларды жою, терроризмге қарсы операцияларды өткізу және төтенше жағдай режимін қамтамасыз ету міндеттерін орындауға тартылған Қарулы күштер мен Шекара қызметінің әскери қызметшілеріне үш еселенген мөлшерде ақшалай төлем жасау туралы түзету енгізді.
Заң жобасында қызметінен уақытша шеттетілген әскери қызметшілерге ең төменгі жалақы мөлшерінде төлем төлеу қарастырылған. Қазіргі тәртіп бойынша мұндай әскери қызметшілер жалақысыз резервке шығарылып келеді.
Бұдан бөлек, 25 жыл және одан көп еңбек өтілі бар әскери қызметшілерге өз еркімен қызметтен босау мүмкіндігі ұсынылады.
Құжатта әскери өкілдер институтының қызметі де реттеледі. Атап айтқанда, әскери өкілдерге «Дипломатиялық қызмет туралы» заңда көзделген дипломатиялық артықшылықтар мен иммунитеттер, еңбекке ақы төлеу шарттары, әлеуметтік және медициналық қамтамасыз ету нормаларын қолдану ұсынылған.
Сонымен қатар жоғары әскери лауазымдарға ұсынылатын кандидаттар үшін цифрлық рейтинг жүйесін енгізу қарастырылған.
Заң жобасында шақыру бойынша әскери қызмет өткеріп жүрген офицерлер декреттік демалыс рәсімдеген жағдайда олардың еңбек өтілін есептеу мерзімін тоқтата тұру нормасы да енгізілген.
«Қазіргі таңда бұл санаттағы адамдар әскери қызметке шақырылғаннан кейін декреттік демалыс рәсімдеп, іс жүзінде қызмет атқармайды», – деп түсіндірді депутат.
Сондай-ақ БҰҰ-ның әскери персонал ұсынғаны үшін мемлекетке төлейтін қаражатын республикалық бюджетке емес, тікелей Қорғаныс министрлігінің шотына аудару туралы түзету енгізілді. Бұл қаражат кейін әскери қызметшілерге төлем жасауға бағытталмақ.
