Астана. 21 мамыр. ИНТЕРФАКС-ҚАЗАҚСТАН — Қазақстанда алдағы әкімшілік амнистия аясында азаматтардың бірнеше миллиард теңге көлеміндегі айыппұлдары есептен шығарылуы мүмкін. Бұл туралы Снежана Имашева мәлімдеді.
«Айыппұлдардың нақты саны туралы айта алмаймын, бірақ жалпы сомасы бірнеше миллиард теңгені құрайды», – деді депутат бейсенбі күні Мәжіліс кулуарында журналистерге.
Оның айтуынша, негізінен есептен шығаруға ішкі істер органдары салған айыппұлдар ұсынылып отыр. Олардың басым бөлігі жол қозғалысы ережелерін бұзуға қатысты.
Алайда адамдардың өмірі мен денсаулығына қауіп төндіретін құқықбұзушылықтар амнистияға ілінбейді. Атап айтқанда, бағдаршамның қызыл түсіне өту, жылдамдықты шамадан тыс асыру және мас күйінде көлік жүргізу секілді заңбұзушылықтар кешірілмейді.
«Қауіптілігі төмен құқықбұзушылықтар бойынша айыппұлдар есептен шығарылуы мүмкін. Мысалы, қауіпсіздік белдігін тақпау немесе көлік жүргізу кезінде ұялы телефон пайдалану», – деп нақтылады Имашева.
Сонымен қатар амнистия аясында кейбір айыппұлдар бойынша есептелген өсімпұлдарды да жою жоспарланып отыр.
Бейсенбі күні Мәжілістің жалпы отырысында депутаттар «Қазақстан Республикасының жаңа Конституциясының қабылдануына байланысты амнистия туралы» заң жобасын жұмысқа қабылдады. Құжатты маусым айының соңына дейін қарап, қабылдау жоспарланған.
Бұған дейін Қасым-Жомарт Тоқаев Парламентке азаматтар мен мемлекет қауіпсіздігіне қатер төндірмеген бірқатар қылмыстық және әкімшілік құқықбұзушылықтарға қатысты амнистия жүргізу туралы заң қабылдауды тапсырған болатын.
Әкімшілік амнистия Қазақстан тарихында алғаш рет өткізілмек.
