Tengrinews.kz басылымы былай деп хабарлайды: «Қазақстанда әуе таксиімен ұшу құны қанша болатынын Үкіметтегі брифинг барысында Премьер-министрдің орынбасары Қанат Бозымбаев айтты. Оның сөзінше, әуе таксиімен ұшудың шамамен құны бір шақырымға бір долларды құрайды. «Мысалы, жолаушы Алматы әуежайына ұшып келді делік. Қазір кептеліске байланысты қалаға жету бір жарым-екі сағат уақыт алады. Әуежай маңына дрондар орналастыру жоспарланып отыр: адам ұшуды алдын ала брондайды. Қазіргі есеп бойынша, шамамен бір шақырым — бір доллар. Яғни 15 шақырым үшін жолаушы 15 доллар төлеп, діттеген жеріне ұшып бара алады», — деді Бозымбаев. Осылайша, жоспар бойынша Алматы әуежайынан қала орталығына дейінгі әуе сапарының құны шамамен 7–8 мың теңгені құрауы мүмкін. Атқарушы билік өкілдері болашақта нарықтық «бәсекелестіктің дамуы есебінен ұшу тарифтері төмендейді» деп үміттенеді. «Бизнес үшін бұл — бәсекелестік орта. Уақыт өте келе қызмет бағасы одан әрі төмендейді. Сонымен қатар жеткізу қызметі де дамиды. Біз Алатаудағы ғимараттардың барлық жобалық шешімдерін жолаушыларға арнап та, жүк тасымалына арнап та дрондарға бейімдеуді жоспарлап отырмыз. Осылайша жеткізу жүйесін ұйымдастыруға мүмкіндік туады», — деп түсіндірді Бозымбаев».
Еуразия24 пікірі:
Белгілі болғандай, Алатау қаласын салу аясында Қазақстанда әуе таксиі мен туристік нысандар орналасатын квадропорттар пайда болуы мүмкін. Жобаның алғашқы сынақтарын алдағы 2–3 жыл ішінде өткізу жоспарланып отыр. Көз алдымызға ертегідей елестейді, ал әуетакси тақырыбының төңірегінде әлі де түсініксіз тұстар шаш етектен. Біріншіден, вице-премьер Қанат Бозымбаев неліктен сапардың 1 шақырымдық құнын теңгемен емес, доллармен жариялайды? Әуетакси идеясының тым инновациялық болғаны соншалық, теңгеміз бұл технологияның деңгейіне әлі өсіп жетпегендіктен емес шығар деп үміттенеміз. Екіншіден, «шақырымына 1 доллар» деген цифр қайдан шықты? Оны кім, нені негізге алып есептеді? Өйткені әуетакси дегеніңіз ауладағы самокат емес. Біздің пайымдауымызша, мұндай жолаушылар дронының біреуі Алматыдағы жарты пәтердің, тіпті одан да қымбат тұратын болады. Ал шығындарды ақтау керек. Және бұл үдерістің Үкіметтің «Бәйтерек» холдингінің ұзақ мерзімді ақшасын инфрақұрылымдық жобаларға салып, үйреніп қалған мерзіміндей тым ұзаққа созылмағаны абзал. Сондай-ақ вице-премьердің «бәсекелестік бәрін арзандатады» деген үміті де таңғалдырады. Әрине, біз бұған сенеміз. Өйткені дәл осындай жағдайды әуе билеттері, ұялы байланыс операторлары және басқа да «бәсекелі» нарықтардан көрдік емес пе. Бұл — әрине, сарказм. Бірнеше жыл күте тұрайық, бәлкім, болып қалар…
