Мәскеу. 22 мамыр. ИНТЕРФАКС – Кевин Уорш жұма күні Ақ үйде АҚШ Федералдық резерв жүйесінің (ФРЖ) 17-төрағасы ретінде ант береді.
АҚШ Сенаты оның кандидатурасын мамыр айының ортасында мақұлдаған болатын.
Уорш ФРЖ-ны АҚШ экономикасы мен орталық банк үшін күрделі кезеңде басқармақ. Таяу Шығыстағы қақтығыс аясында елдегі инфляция үдей түскен кезде, АҚШ президенті Дональд Трамп ФРЖ-ны пайыздық мөлшерлемелерді жедел төмендетуге құлықсыз деп сынға алып келеді.
Федералдық резерв жүйесіне жасалып жатқан саяси қысым кейбір инвесторлар мен сарапшылар арасында америкалық орталық банктің тәуелсіздігіне қауіп төніп отыр деген алаңдаушылық туғызды. Сенаттағы тыңдаулар барысында Уорш бірнеше мәрте тәуелсіз саясат ұстанатынын мәлімдеген.
Bloomberg агенттігінің жазуынша, жаңа төрағаның ант беру рәсімі инвесторлар мен сарапшылардың ерекше назарында болмақ. Олар, әсіресе, Дональд Трамптың Федералдық резерв жүйесіне базалық мөлшерлемені төмендету жөніндегі талабын қайталай ма деген мәселеге мән беріп отыр. Агенттік пікірінше, бұл мәлімдемелер Трамп пен Уорш арасындағы алдағы айлардағы қарым-қатынастың сипатын айқындауы мүмкін.
Уорш АҚШ орталық банкінде ауқымды өзгерістер жүргізуге ниетті екенін мәлімдеді. Оның ішінде көлемі 6,7 трлн долларды құрайтын активтер балансын қысқарту, инфляцияны талдаудың жаңа жүйесін енгізу және қоғаммен коммуникация тәсілдерін қайта қарау жоспарланып отыр.
АҚШ орталық банкінің бұрынғы басшысы Джером Пауэллдің өкілеттік мерзімі 15 мамырда аяқталды. Ол бұл қызметті сегіз жыл атқарды. Дегенмен Пауэлл әзірге ФРЖ басқарушылар кеңесінен кетуді жоспарлап отырған жоқ және 2028 жылға дейін оның мүшесі болып қала алады.
