Астана. 22 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев пен Токио губернаторы Юрико Коикэ Астанада цифрлық технологиялар, халықаралық қаржы және білім беру салаларында әріптестік орнату мүмкіндіктерін талқылады. Бұл туралы жұма күні Президенттің баспасөз қызметі хабарлады.
Кездесу барысында Мемлекет басшысы Юрико Коикэнің жетекшілігімен Токио әлемдегі ең қауіпсіз, ең таза әрі тиімді басқарылатын мегаполистердің бірі саналып отырғанын атап өтті.
«Қазақстанда Сізді уақыт сынынан өткен дос, сенімді серіктес әрі көрнекті мемлекет қайраткері ретінде жақсы біледі. Қазақстанның тарихы мен мәдениетін насихаттауға бағытталған күш-жігеріңізге ерекше мән береміз. Бұл бастамалар халықтарымыздың жақындасуына ықпал етеді», – деп атап өтті Мемлекет басшысы. Оның сөзін Президенттің баспасөз қызметі келтіреді.
Тоқаев өткен жылы Жапонияға жасаған ресми сапарын еске алып, оның қорытындысы бойынша екіжақты қатынастардың сапалық жаңа деңгейге көтерілгенін айтты.
«Мен Токиодағы “Ақылды қала” бағдарламасымен таныстым. Бұл біз үшін өте қызықты болды, өйткені Қазақстанда да Smart City тұжырымдамасы белсенді түрде дамытылып жатыр. Сіздің Астанаға сапарыңыз мегаполистерді басқару саласындағы ынтымақтастық пен тәжірибе алмасуды одан әрі дамытуға тың серпін береді деп сенемін», – деді Президент.
Өз кезегінде Токио губернаторы жылы қабылдау үшін Мемлекет басшысына алғыс білдірді.
«Өңірдегі ірі экономика әрі елеулі ресурстарға ие мемлекет ретінде Қазақстан Еуропа мен Азияны байланыстыратын Орталық Азиядағы негізгі хаб ретіндегі рөлін нығайтып келеді», – деді губернатор.
Тоқаев Юрико Коикэні Қазақстан мен Жапония арасындағы достық байланыстарды нығайтуға қосқан елеулі үлесі үшін І дәрежелі «Достық» орденімен марапаттады.
