ҚР Көлік министрлігі хабарлауынша, 2026 жылғы 22 мамырда Астанада Қазақстан Республикасы көлік вице-министрі Жәнібек Тайжанов пен Еуропалық комиссияның халықаралық әріптестік жөніндегі бас директоратының тұрақты көлік және қалалық даму бөлімінің басшысы Серхио Ольете Хосаның екіжақты кездесуі өтті. Келіссөз барысында тараптар Транскаспий халықаралық көлік бағытының қазіргі ахуалы мен негізгі жетістіктерін талқылады. Транзиттік тасымал көлемінің тұрақты өсімі, жүк жеткізу мерзімдерінің едәуір қысқаруы, сондай-ақ контейнерлік тасымалды одан әрі ұлғайту жоспарлары атап өтілді. Кездесуде Каспий өңіріндегі порт инфрақұрылымын дамыту мәселесіне ерекше назар аударылды. Қазақстан тарапы Еуропалық қайта құру және даму банкі (ЕҚДБ) мен Еуропалық одақтың қаржылық қолдауымен Ақтау теңіз портындағы айлақтарды жаңғырту жұмыстарының барысы туралы, сондай-ақ жаңа кемелер салу және Каспийдегі паром қатынасын дамыту жөнінде ақпарат берді. Кездесу қорытындысы бойынша тараптар көлік саласындағы әріптестікті одан әрі нығайтуға өзара мүдделі екенін растады. Сондай-ақ Азия мен Еуропаны байланыстыратын сенімді әрі бәсекеге қабілетті бағыт ретінде Транскаспий дәлізін дамыту мақсатында сындарлы диалогты жалғастыруға дайын екендерін білдірді.
Еуразия24 пікірі:
Еуропалық капиталдың өңірдегі инфрақұрылымдық жобаларға қатысуы Еуропалық одақтың Қазақстанды Еуропа мен Азия арасындағы толыққанды стратегиялық логистикалық хаб ретінде қарастыратынын көрсетеді. ЕО мен Еуропалық қайта құру және даму банкі (ЕҚДБ) порттарды жаңғыртуға, Каспий бағытындағы инфрақұрылымды дамытуға, айлақтар мен паром флотын жаңартуға инвестиция құйып отыр. Бұл, бір жағынан, маршрутқа деген сенімді білдірсе, екінші жағынан, аталған жобалардың инвестициялық тұрғыдан тартымды екенін аңғартады. Егер Еуропада Транскаспий бағыты болашақ еуразиялық логистиканың маңызды бөлігі ретінде қарастырылып отырса, онда бұл Қазақстан үшін бірнеше бағыт бойынша тиімді болмақ. Атап айтқанда, инфрақұрылымға тікелей инвестиция тартуға, транзиттік табысты арттыруға және көлік жүйесінің жүктемесін көбейтуге мүмкіндік береді. Транзит тек жүк тасымалы үшін алынатын төлеммен шектелмейді. Ол сервистік қызмет көрсету, жөндеу, сақтандыру, қойма бизнесі секілді сабақтас салалардың дамуына ықпал етіп, тұтас өңірлерде жаңа жұмыс орындарын ашуға жол ашады. Қазіргі жағдайда сенімді көлік дәліздері жаңа «мұнайға» айналып келеді. Олар үшін мемлекеттер арасында бәсеке күшейіп, ауқымды инвестициялар тартылуда әрі олардың төңірегінде ұзақ мерзімді экономикалық байланыстар қалыптасып жатыр.
