Брюссель. 25 мамыр. ИНТЕРФАКС — Батыс Еуропаның бірқатар елдерінде мамыр айының соңына қарай температуралық рекордтар тіркелуі мүмкін, деп жазады Politico.
Аптап ыстық әсіресе осы апта соңында Испания мен Португалия аумағында күшейеді деп күтілуде. Португалияның кей өңірлерінде ауа температурасы 40 градусқа дейін жетуі мүмкін.
Сонымен қатар, Франция, Бельгия және Ұлыбритания елдерінің синоптиктері де алдағы күндері мамыр айындағы орташа көрсеткіштен әлдеқайда жоғары температура болатынын болжады.
Францияның метеорологиялық қызметі дүйсенбі күні-ақ 18 департаментте, соның ішінде Париж қаласында ыстыққа байланысты қауіп деңгейін көтерді. Қазір Парижде өтіп жатқан Францияның теннистен Ашық чемпионатында спортшылар мен көрермендер 30 градустық ыстыққа тап болып отыр.
Ал британдық синоптиктер биылғы мамыр айындағы ең жоғары температура тіркелгенін хабарлады. Лондон маңында ауа температурасы 34 градусқа дейін көтерілген.
