Астана. 28 мамыр. ИНТЕРФАКС-ҚАЗАҚСТАН – Қазақстан Парламенті Мәжілісі бейсенбі күнгі пленарлық отырыста «Қазақстан Республикасының Мамандандырылған мекемелердің артықшылықтары мен иммунитеттері туралы конвенцияға қатысты ескертпесі мен мәлімдемесін алып тастау туралы» заңды қабылдады.
Бұған дейін Қазақстан 2020 жылы Конвенцияны ратификациялау кезінде бірқатар артықшылықтар мен иммунитеттердің ел азаматтарына қолданылмайтынын көрсеткен болатын. Атап айтқанда, бұл иммиграциялық шектеулер мен шетел азаматтарын тіркеу талаптарынан босату, валюталық жеңілдіктер және халықаралық дағдарыстар кезінде репатриацияға байланысты жеңілдіктерге қатысты болды. Сонымен қатар Қазақстан «кедендік алымдар» термині ұлттық заңнамаға сәйкес қолданылатынын мәлімдеген еді.
Алайда БҰҰ-ның 14 мамандандырылған мекемесі аталған ескертпелер мен мәлімдемеге қарсылық білдірді. Соның нәтижесінде Конвенция Қазақстан үшін күшіне енбей, ел аумағында қолданылмады.
Мәжіліс мақұлдаған заң ескертпелер мен мәлімдемені алып тастауды көздейді. Бұл Конвенцияны толыққанды қолдануға және БҰҰ-ның мамандандырылған мекемелерінің Қазақстанда жұмыс істеуі мен орналасуына құқықтық жағдай жасауға мүмкіндік береді.
Құжат енді қарау үшін Сенатқа жолданады.
