Астана. 28 мамыр. ИНТЕРФАКС-ҚАЗАҚСТАН – Қазақстан мен Ресей арасындағы тауар айналымы жақын арада $30 млрд межесіне жетеді. Қазіргі уақытта екі ел жалпы құны $53 млрд болатын 177 бірлескен жобаны іске асыруда. Бұл туралы Қазақстан Президенті Қасым-Жомарт Тоқаев мәлімдеді.
«Әлемдегі күрделі жағдайға қарамастан, біздің ынтымақтастығымыз, әсіресе экономикалық саладағы байланыстарымыз табысты дамып келе жатқанын және сауда көлемінің өсіп отырғанын ерекше қанағаттанушылықпен атап өткім келеді», – деді Тоқаев Астанада Ресей президентімен кеңейтілген құрамдағы келіссөздер барысында.
«Өзара тауар айналымының көрсеткіштеріне келсек, мен оған сенімдімін, жақын уақытта ол маңызды $30 млрд межесінен асады», – деді мемлекет басшысы.
Тоқаевтың айтуынша, қазіргі уақытта жалпы инвестиция көлемі шамамен $53 млрд болатын 177 бірлескен жобадан тұратын пул қалыптастырылған.
«Аталған 177 жобаның 122-сі операциялық циклге енгізілді, яғни олар жүзеге асырылып, жұмыс істеп тұр», – деп нақтылады Президент.
Мемлекет басшысы Ресейдің Қазақстан экономикасындағы ең ірі инвестор екенін атап өтті. Сонымен қатар Қазақстанның Ресей экономикасына салған инвестиция көлемі $29 млрд-тан асқан.
