Астана. 28 мамыр. ИНТЕРФАКС-ҚАЗАҚСТАН – Қазақстан Парламенті Мәжілісі бейсенбі күнгі пленарлық отырыста «Экология мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасын бірінші оқылымда мақұлдады.
Түзетулер экология саласын цифрландыруға және қоршаған орта мен табиғи ресурстардың жай-күйі туралы бірыңғай ақпараттық жүйенің жұмыс тәртібін айқындауға бағытталған.
Құжатта сондай-ақ көміртектің қайталама нарығындағы сауданы реттеу, қалдықтарды басқару жүйесін жетілдіру және өндірушілер мен импорттаушылардың кеңейтілген міндеттемелері қағидатын іске асыру көзделген. Бұдан бөлек, Ұлттық гидрометеорологиялық қызметтің жұмысын, мемлекеттік экологиялық сараптама жүргізу және қоғамдық тыңдаулар өткізу мәселелерін жетілдіру ұсынылады.
Заң жобасын талқылау барысында депутаттар бірқатар қосымша түзетулер енгізді. Атап айтқанда, инвестициялық жобалар мен көмірсутектерді барлау жобалары үшін экологиялық рұқсаттар мен қорытындылар алу мерзімдерін қысқарту ұсынылып отыр. Бұл норма теңіздегі барлау жұмыстарына қолданылмайды.
Сонымен қатар көмірсутектерді барлау, сондай-ақ газды, газ өңдеу өнімдерін, мұнай мен мұнай өнімдерін магистральдық құбырлар арқылы тасымалдау қызметі I санаттағы объектілерден II санаттағы объектілер қатарына ауыстырылады.
Түзетулерде қалдықтарды басқару және қайталама ресурстарды қайта өңдеу жүйесін ұйымдастырушылық-техникалық әрі ақпараттық қамтамасыз ету тәртібін бекіту жөніндегі уәкілетті органның құзыреті нақтыланады. Сондай-ақ климаттық қаржыландыру қағидаларын және Біріккен Ұлттар Ұйымының Климаттың өзгеруі жөніндегі негіздемелік конвенциясы аясындағы Париж келісімі 6-бабының нарықтық тетіктерін іске асыру қағидаларын бекіту өкілеттігі белгіленеді.
Бұдан бөлек, ауыл, кент және ауылдық округ әкімдіктерінің коммуналдық қалдықтарды жинау, сұрыптау және көму орындарын ұйымдастыру жөніндегі құзыретін бекіту ұсынылады.
