Астана. 29 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Қазақстан Республикасының мемлекеттік басқару жүйесін одан әрі жетілдіру жөніндегі шаралар туралы» Жарлыққа қол қойды, деп хабарлады Мемлекет басшысының баспасөз қызметі.
«Жарлыққа сәйкес Қазақстан Республикасы Қауіпсіздік Кеңесінің Аппараты Қазақстан Республикасының Президентіне тікелей бағынатын және есеп беретін мемлекеттік орган ретінде құрылды», – делінген хабарламада.
Қазақстанның Қауіпсіздік Кеңесі – Президент құратын конституциялық орган. Ол елдегі ішкі саяси тұрақтылықты сақтау, конституциялық құрылысты, мемлекеттік тәуелсіздік пен аумақтық тұтастықты қорғау, сондай-ақ Қазақстанның халықаралық аренадағы ұлттық мүдделерін қамтамасыз ету мақсатында ұлттық қауіпсіздік пен қорғаныс саласындағы бірыңғай мемлекеттік саясатты үйлестіреді. Қауіпсіздік Кеңесіне Қазақстан Президенті төрағалық етеді және оның құрамын да Мемлекет басшысы жасақтайды.
«Қазақстан Республикасының Қауіпсіздік Кеңесі туралы» заңға сәйкес, Қауіпсіздік Кеңесінің Аппараты оның жұмысына қажетті ақпараттық-талдамалық және ұйымдастырушылық қолдау көрсетеді.
