Астана. 4 маусым. ИНТЕРФАКС-ҚАЗАҚСТАН – Қазақстандағы заманауи президенттік басқару үлгісі өзінің бастауын Алтын Орда дәуірінде қалыптасқан саяси жүйеден алады. Бұл туралы Қазақстан Президенті Қасым-Жомарт Тоқаев Астанада өткен Мемлекеттік туды көтеру рәсімінде мәлімдеді.
«Алтын Орда өзіндік билік институттары, дипломатиялық қызметі, байланыс және кеден жүйесі, халықаралық деңгейде мойындалған валютасы мен өз дәуіріне тән озық технологиялары бар ірі ортағасырлық мемлекет болды. Қазақстанда берік орныққан қазіргі президенттік басқару моделі Алтын Орда кезеңінде қалыптасқан саяси жүйеден бастау алады», – деді Тоқаев.
Президенттің айтуынша, Алтын Орданың басты мұрасы – оның мызғымас құндылықтары. Бұл құндылықтар ортақ қағидалар жүйесі аясында алып мемлекеттегі түрлі діндерге, тілдерге, мәдениеттер мен дәстүрлерге жататын халықтарды бір арнаға тоғыстырды.
«Ата-бабаларымыздың даңқты жолы әрдайым біз үшін үлгі әрі стратегиялық бағдар болып қала береді», – деді Мемлекет басшысы.
Тоқаев Алтын Орданың жетістіктері Еуразиядағы көптеген заманауи халықтарға ортақ мұра екенін атап өтті.
«Сондықтан біз Алтын Орда мұрасына жүгіну арқылы барлық мемлекеттері бейбіт өмір сүретін, ортақ қауіпсіздікті қамтамасыз етіп, халықтарының игілігі жолында еңбек ететін біртұтас әрі гүлденген Еуразияны қолдаймыз», – деді Президент.
Оның сөзінше, басты міндет – ескірген тәжірибелер мен бөгде идеяларды ойланбастан көшіру немесе оларды насихаттау емес, сондай-ақ мазмұнсыз пікірталастарға қатысу да емес.
«Біздің міндетіміз – ұлы дәуірдің құндылықтарын терең пайымдап, сапалы жаңғырту және оларды қазіргі өркениеттің талаптарына бейімдеу», – деп толықтырды Тоқаев.
Сонымен қатар Президент Астанада жақын арада Ұлы дала өркениетінің жетістіктеріне арналған ауқымды нысанның құрылысы басталатынын хабарлады.
«Елордада таяу уақытта Ұлы дала өркениетінің жетістіктеріне арналған ауқымды нысанның құрылысы басталады», – деді Мемлекет басшысы.
