Астана. 4 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев бейсенбі күні Астанада өткен Мемлекеттік туды көтеру рәсіміне қатысып, қазақстандықтарды Мемлекеттік рәміздер күнімен құттықтады. Бұл туралы Мемлекет басшысының баспасөз қызметі хабарлады.
«Сіздерді Мемлекеттік рәміздер күнімен құттықтаймын! Бұл – қасиетті Отанымыздың әрбір азаматы үшін ерекше маңызға ие мереке. Осы күні біз Көк туымызды биікке көтереміз. Осы арқылы бүкіл әлемге тәуелсіз әрі мақтанышты ел екенімізді паш етеміз», – деді Тоқаев салтанатты рәсімде сөйлеген сөзінде.
Мемлекет басшысы өз сөзінде мемлекеттік рәміздерді құрметтеу патриоттық рухтың ең жоғары өлшемі екенін атап өтті.
Президент биыл Қазақстан тәуелсіздігінің 35 жылдығы атап өтілетінін де еске салды.
«Бұл тарихи белес жүріп өткен жолымызды терең зерделеп, жан-жақты саралауға және болашаққа арналған стратегиялық жоспарларды айқындауға мүмкіндік береді. Біз бұл мерейлі датаны табанды еңбекпен және нақты нәтижелермен қарсы алуымыз керек», – деп атап өтті ол.
Салтанатты рәсім аясында Мемлекет басшысы әскери оқу орындарының түлектеріне погон тапсырды.
«Өткен жылы мен үздік түлектерді қолдау туралы бастама көтердім. Сол кезде оларға бұрынғыдай лейтенант емес, аға лейтенант әскери атағын беру қажеттігін айтқан едім. Осыған қатысты тиісті тапсырма берілді және бүгін ол іс жүзінде жүзеге асырылады», – деді Президент.
