Мәскеу. 5 маусым. ИНТЕРФАКС – Америкалық SpaceX компаниясының 2040 жылғы кірісі 3,4 трлн АҚШ долларына жетуі мүмкін. Мұндай болжамды компанияның IPO-сын ұйымдастырушылардың бірі болып саналатын Morgan Stanley ұсынды.
Бұл деректер банктің жетекші инвесторларға таныстырған зерттеуінде келтірілген. Бұл туралы The Wall Street Journal дереккөздерге сілтеме жасап хабарлады.
Morgan Stanley бағалауынша, Илон Маск негізін қалаған компанияның түзетілген EBITDA көрсеткіші 2040 жылы 2,7 трлн доллардан асуы мүмкін.
Сонымен қатар, IPO-ның тағы бір жетекші ұйымдастырушысы болып табылатын Goldman Sachs Group пен Morgan Stanley сарапшылары 2028 жылы SpaceX кірісі шамамен 160 млрд доллар болады деп болжайды.
Goldman Sachs 2030 жылғы кірісті 470 млрд доллардан жоғары деңгейде бағаласа, Morgan Stanley бұл көрсеткішті шамамен 330 млрд доллар көлемінде болжайды.
Екі банк те биылдан кейін SpaceX табысының негізгі бөлігі жасанды интеллект бағытындағы қызметтен түседі деп есептейді. Сарапшылардың пікірінше, бұл сегменттің өсімі жоғары қарқынмен жалғасады.
Goldman Sachs болжамына сәйкес, жасанды интеллект бағытының кірісі 2030 жылы 322 млрд долларға жетуі мүмкін. Ал Morgan Stanley бұл көрсеткішті 190 млрд доллар деңгейінде бағалап отыр.
Екі қаржы институты да компанияның түзетілген EBITDA көрсеткіші 2028 жылы шамамен 110 млрд доллар болады деп күтеді. 2030 жылға қарай Goldman Sachs оны 352 млрд доллар, ал Morgan Stanley 230 млрд доллар деңгейінде болжайды.
SpaceX-тің жалпы кірісі 2025 жылы 18,7 млрд долларды құраған. Оның ішінде 3,2 млрд доллары жасанды интеллект бағытынан түскен.
Компания акцияларын келесі аптада орналастыруды жоспарлап отыр. IPO көлемі 75 млрд долларды құрайды, ал компанияның жалпы нарықтық бағасы шамамен 1,75 трлн доллар деңгейінде бағалануда.
SpaceX акциялары 12 маусымнан бастап Nasdaq биржасында SPCX тикерімен саудалана бастайды.
