Астана. 9 маусым. ИНТЕРФАКС-ҚАЗАҚСТАН — Қазақстан Президенті Қасым-Жомарт Тоқаев Абай облысына инвестиция тарту жұмыстарын жандандыруды тапсырды. Өңірдегі инвестициялық пулға енгізілген жобалардың жалпы көлемі бір жыл ішінде екі есеге артып, 4,4 трлн теңгеге жеткен.
Президенттің баспасөз қызметінің хабарлауынша, мемлекет басшысы Абай облысының әкімі Берік Уәлимен кездесіп, өңірдің 2025 жылғы әлеуметтік-экономикалық даму қорытындылары мен 2026 жылдың қаңтар-сәуір айларындағы көрсеткіштері туралы есепті тыңдады.
Әкімнің мәліметінше, биылғы төрт айдың қорытындысы бойынша қысқа мерзімді экономикалық индикатор 103,8 пайызды құраған, ал инвестиция көлемі 19,4 пайызға өскен. Өнеркәсіп, өңдеу секторы, ауыл шаруашылығы, құрылыс және көлік салаларында оң динамика сақталып отыр.
Берік Уәли өңірдің жалпы инвестициялық пулындағы жобалар саны өткен жылмен салыстырғанда 29-дан 112-ге дейін артқанын баяндады. Сонымен қатар жоспарланған инвестициялар көлемі 2,2 трлн теңгеден 4,4 трлн теңгеге дейін ұлғайған.
Ірі жобалардың қатарында құны 577,5 млрд теңгені құрайтын Аягөз – Бақты теміржол желісінің құрылысы, Семей қаласында инвестиция көлемі 714 млрд теңге болатын жаңа жылу электр орталығының салынуы және құны 255 млрд теңге болатын тау-кен байыту комбинатының құрылысы бар.
Сондай-ақ Президентке Семейде арнайы экономикалық аймақ құру жоспары таныстырылды. Бұл аймақ аясында жалпы құны 400 млрд теңгені құрайтын өндірістік жобаларды іске асыру және 2,5 мың жаңа жұмыс орнын ашу көзделіп отыр. Әкімдік мәліметінше, қазіргі уақытта үш ірі жоба бойынша ұсыныстар келіп түскен.
Өңір басшысы мемлекет басшысына Алакөл көлі жағалауындағы туристік аймақты дамыту жөнінде де ақпарат берді. 2026 жылы жағалау инфрақұрылымын жаңғыртуға 15,4 млрд теңге бөлінеді. Оның ішінде 11,6 млрд теңге Арнаулы мемлекеттік қордан электр желілерін тартуға және Үржар әуежайының терминалын реконструкциялауға бағытталмақ.
Сонымен қатар Президентке инженерлік инфрақұрылымды жаңғырту жобалары таныстырылды. Олардың қатарында сумен жабдықтау, кәріз және жылумен қамту желілерін жаңарту, Семейдегі жаңа көпір құрылысын аяқтау, тұрғын үй құрылысы мен жол желісін дамыту бастамалары бар.
Кездесу қорытындысында Мемлекет басшысы өңірге инвестиция тартуды күшейтуге, экономиканы әртараптандыруға, инфрақұрылымды жаңғыртуға және халықтың өмір сүру сапасын арттыруға бағытталған бірқатар нақты тапсырма берді.
Берік Уәлидің айтуынша, 2025 жылдың қорытындысы бойынша Абай облысының жалпы өңірлік өнімі 3,9 трлн теңгеге жеткен.
