Kursiv басылымының хабарлауынша, ҚР Ішкі істер министрлігі Алматыдағы әл-Фараби даңғылында болған, қоғамда үлкен резонанс тудырған өлімге әкеп соққан апаттан кейін қозғалған жанама қылмыстық істердің бірін қысқартты. Бұл ретте жүргізушіге жалған мемлекеттік нөмірлердің заңсыз берілу фактісі бойынша жүргізілген тергеу туралы сөз болып отыр. Естеріңізге сала кетейік, қайғылы оқиғадан кейін бірден сотталушының көлікті тіркеу құжаттарына сәйкес келмейтін 100 QR 02 нөмірімен басқарғаны анықталған еді. Наурыз айының соңында ІІМ-нің Өзіндік қауіпсіздік департаменті полиция қызметкерлеріне қатысты «Билікті немесе лауазымдық өкілеттіктерді асыра пайдалану» бабы бойынша тексеру бастаған. Алайда бұл іс бойынша ешкім жауапқа тартылмады. Ведомство таратқан мәліметте: «2026 жылғы 3 маусымда ҚР Қылмыстық кодексінің 362-бабы 1-бөлігі бойынша қозғалған сотқа дейінгі тергеп-тексеру ісі ҚР Қылмыстық-процестік кодексінің 35-бабы 1-бөлігінің 2-тармағы негізінде, яғни қылмыстық құқық бұзушылық құрамының болмауына байланысты қысқартылды», — делінген. Күдікке ілінген азамат — Алматы қалалық Полиция департаменті басшыларының бірінің жүргізушісі. Сонымен қатар, Алматы полициясы «Ауыр зардаптарға әкеп соққан қызметтегі әрекетсіздік» бабы бойынша да тергеуді аяқтады. Бұл істегі басты айыпталушы — Алматы қалалық ПД жетекшілерінің бірінің жеке жүргізушісі болып жұмыс істеген қазіргі полиция қызметкері. «2026 жылғы 20 мамырда Алматы қалалық полиция департаменті ҚР ҚК-нің 370-бабы 4-бөлігі 1-тармағы бойынша сотқа дейінгі тергеп-тексеруді аяқтады. Қазіргі уақытта қылмыстық іс Алматы қаласының прокуратурасында зерделеніп жатыр», — деп нақтылады ведомстводан.
Еуразия24 пікірі:
Тергеу нұсқасы бойынша 21 наурызда үш бірдей адамның өліміне кінәлі деп танылған Александр Пактың ісі сотталушы мен оның сыбайластары үшін белгісіз бір себептермен оңтайлы бағытқа бұрыла бастағандай көрінеді. Мас күйінде, жалған нөмір тағып, қарсы жолақпен сағатына 219 шақырым жылдамдықпен жүріп келіп, басқа көлікті соққан 32 жастағы кәсіпкерді бүгінде қаза тапқандардың туыстарының өзі кешірген. Заң бойынша бұл Пакты қылмыстық жауаптылықтан босатуға негіз болмайтыны анық, өйткені ҚР Қылмыстық кодексінің 345-бабының 4-бөлігі бес жылдан он жылға дейін бас бостандығынан айыру жазасын көздейді. Алайда кінәсін мойындамау және жәбірленушілер тарапынан кешірім болмаған жағдайда ең жоғары мерзім тағайындалуы мүмкін болса, ал жеңілдететін мән-жайлар ескерілген кезде ең төменгі жаза қолданылуы ықтимал. Ал енді қайғылы оқиғадан кейін Ішкі істер министрлігінің басшылығы қатаң жауапкершілікке тартуға уәде берген әрекетсіздік танытқан полиция қызметкерлері бірінен соң бірі қылмыстық қудалау аясынан тыс қалып жатқандай. Уақыт деген расында да таңғаларлық нәрсе. Қажет кезінде ол көп дүниені ұмыттыра алады. Қазақстанда прецеденттік құқық жүйесі жоқ болғаны жақсы. Әйтпесе, қайғылы оқиғаға алып келген заң бұзушылықтардың тұтас жиынтығымен есте қалған Александр Пактың ісі болашақта осындай әрекетке барған өзге бір қазақстандық үшін үлгі ретінде қабылдануы да мүмкін еді.
