ҚР Үкіметі хабарлайды: «Туризмнің ел экономикасына қосқан үлесі 5 трлн теңгеге жетті. Бүгінгі таңда бұл салада 600 мыңнан астам адам еңбек етуде. Бұл туралы Үкімет отырысында Туризм және спорт министрі Ербол Мырзабосынов мәлімдеді. Оның айтуынша, шетелдік туристердің республикадағы шығындары 2,9 млрд долларды құраған. Бұл ретте туристік салаға тартылған инвестиция көлемі өткен жылмен салыстырғанда 33%-ға өсіп, 1,3 трлн теңгеге жетті. Салық түсімдерінің көлемі 18%-ға артып, 630 млрд теңгені құрады. «Саланы одан әрі дамыту мақсатында биыл наурыз айында заңнамалық түзетулер қабылданды. Атап айтқанда, туристік автобустар үшін «жасыл дәліз» механизмі енгізілуде. Бұл ұйымдасқан туристік топтардың мемлекеттік шекарадан өту уақытын айтарлықтай қысқартуға мүмкіндік береді. Визит-орталық ұғымы бекітіліп, оларды құру мен олардың жұмыс істеуіне қойылатын негізгі талаптар айқындалды. Туристік қызметтердің сапасын арттыру мақсатында гидтердің, экскурсоводтардың және туризм нұсқаушыларының қызметін жүзеге асыру қағидалары бекітіледі», — деп атап өтті Ербол Мырзабосынов».
Еуразия24 пікірі:
Қазақстанның Туризм министрлігі елге келген 15,7 млн шетелдіктің 11,1 миллионын «турист» деп жіктеп, осы санды алға тартқанды ұнатады. Алайда халықаралық статистика бойынша, Шарын шатқалын тамашалауға немесе Шымбұлақта шаңғы тебуге келгендер ғана турист емес. Елге тұрақты тұруға немесе жұмыс істеуге келмеген кез келген шетелдік қонақ (мейлі ол туысшылап, шаруасымен, емделуге, оқуға, сауда жасауға немесе басқа да мақсатпен келсін) турист санатына жатады. Сондықтан «11 млн турист» дегенді естігенде, бірден қолына фотоаппарат ұстап, чемодан сүйреткен саяхатшыларды елестету — қате түсінік. Іс жүзінде бұл ағынның басым бөлігін туыстық, жеке, сауда немесе қызметтік шаруалармен келетін көршілес елдердің азаматтары құрап отыр. Егер бұл пікіріміз қате болса, қарсы дәлелдерді де мұқият зерделеуге әзірміз. Иә, халықаралық әдістеме оларды туристер қатарына қосуға мүмкіндік береді, бірақ туризм индустриясын дамыту тұрғысынан алғанда, бұл классикалық шетелдік туризмнен мүлдем бөлек нәрсе. Тағы бір назар аударарлық дерек: 2025 жылы келген 15,7 млн шетелдік қонақтың тек 1,4 миллионға жуығы ғана қонақүй қызметін пайдаланған. Әрине, бұл қалғандары турист емес деген сөз емес, бірақ жалпы статистикаға қаншалықты абайлап қарау керектігін көрсетеді. Не де болса, Туризм және спорт министрлігі мен оның көрсеткіштері (KPI) үшін өте қуаныштымыз.
