LSM агенттігі хабарлайды: « Yandex Qazaqstan 2026 жылы Қазақстандағы үздік жұмыс берушілердің бірі ретінде Top Employers Institute нұсқасы бойынша танылды. Бұл сертификат компанияның персоналды басқару стратегияларының тиімділігі, нақты мақсаттарға бағдарлануы, қызметкерлердің жұмысқа тартылуы мен кәсіби дамуын қамтамасыз ету арқылы жоғары нәтижелі жұмыс ортасын қалыптастыра алатынын растайды. «Top Employer 2026 ұлттық сертификатын алу – Yandex Qazaqstan компаниясының тұрақты бизнес-нәтижелерге қол жеткізуге ықпал ететін үздік жұмыс ортасын қалыптастыруға деген ұстанымының айқын көрінісі. Қазақстандағы еңбек мәдениетін жақсартуға қосқан елеулі үлесі үшін бұл компанияны атап өткенімізді мақтан тұтамыз», – деді Top Employers Institute ұйымының бас директоры Адриан Селигман. Top Employers Institute әлемнің 131 елінде қызмет атқарады. Ұйым компанияларды персоналмен жұмыс істеу стратегиясы, жұмыс ортасы, таланттарды тарту, оқыту мен дамыту, әртүрлілік, тең мүмкіндіктер қағидаттарын сақтау және қызметкерлердің әл-ауқатын қамтамасыз ету бағыттары бойынша жүргізілген зерттеу нәтижелері негізінде сертификаттайды».
Еуразия24 пікірі:
Yandex Qazaqstan компаниясының еліміздегі ең үздік жұмыс беруші атанғанына біз де қуаныштымыз. Бірақ бұл жерде бір қызық жайт бар: жұмыс беруші ретіндегі Yandex Qazaqstan мен курьерлер, таксистер және өзге де орындаушылар үшін платформа саналатын Яндекс экожүйесі — екі бөлек нәрсе. Қазақстанда Яндекс сервистерінде жүрген курьерлер мен такси жүргізушілерінің басым бөлігі Yandex Qazaqstan компаниясының штаттық қызметкері болып есептелмейді. Олар серіктес компаниялар, жеке кәсіпкерлік (ЖК) немесе платформалық жұмыспен қамтудың түрлі үлгілері арқылы еңбек етеді. Сондықтан олардың еңбек жағдайлары Top Employers Institute жүргізетін бағалау аясына мүлде кірмеуі де мүмкін. Бұл белгілі бір авиакомпанияның бас кеңсесіндегі қызметкерлердің еңбек жағдайын бағалап, әуежайларда жұмыс істейтін мыңдаған мердігердің пікірін есепке алмаумен бірдей жағдайды еске салады. Біздің түсінігімізде «үздік жұмыс беруші» деген ұғым компаниядағы барлық қызметкерлер үшін қолайлы еңбек жағдайы жасалған компания дегенді білдіреді. Әрине, Яндекс платформасы арқылы жұмыс тауып отырған серіктестердің де жағдайы жақсы шығар және рейтинг жасалған кезде олардың да үлесі ескерілген болар. Өйткені Қазақстанда ондаған мың курьер мен такси жүргізушісі тәулік бойы осы сервис арқылы еңбек етіп жүр.
