Астана. 1 шілде. ИНТЕРФАКС-ҚАЗАҚСТАН – Қазақстанда жалпыхалықтық референдумда қабылданған жаңа Конституция 1 шілдеден бастап күшіне енді. Осыған байланысты 1995 жылғы 30 тамызда қабылданған бұрынғы Ата Заңның күші жойылды.
Сонымен қатар Мәжіліс пен Сенаттан тұратын екі палаталы Парламенттің өкілеттігі де тоқтатылды.
2026 жылғы 15 наурыздағы республикалық референдумда қабылданған жаңа Конституцияға сәйкес, вице-президент лауазымы енгізіледі. Бұған қоса, Парламент бір палаталы құрылымға көшіп, Құрылтай деп аталатын болады. Оның құрамына тек партиялық тізім бойынша сайланатын 145 депутат кіреді.
Сондай-ақ заң шығару бастамасы құқығы берілетін жоғары консультативтік орган – «Халық кеңесі» құрылады. Ал Қазақстан халқы Ассамблеясы таратылды.
Конституция күшіне енген күннен бастап бір ай ішінде Президент Құрылтай сайлауын тағайындауы тиіс, ал сайлау екі айдың ішінде өткізілуі қажет. Бұған дейін Қазақстан Президенті Қасым-Жомарт Тоқаев сайлаудың тамыз айында өтетінін мәлімдеген болатын.
Бірінші шақырылымдағы Құрылтайдың алғашқы сессиясы ашылған күннен бастап екі ай ішінде Президент Құрылтайдың келісімімен вице-президентті тағайындауға тиіс.
Бастапқыда Президент Қасым-Жомарт Тоқаевтың бастамасымен Қазақстанда екі палаталы Парламенттен бір палаталы модельге көшуді көздейтін парламенттік реформаны жүзеге асыру жоспарланған еді. Алайда кейін жұмыс тобы Ата Заңға ауқымды өзгерістер енгізуді ұсынып, соның нәтижесінде жаңа Конституция қабылдау туралы шешім қабылданды.
Енді Қазақстанның Конституция күні мемлекеттік мерекесі жыл сайын 30 тамызда емес, 15 наурызда атап өтіледі.
