Вашингтон. 2 шілде. ИНТЕРФАКС – АҚШ-тың Atlas V зымыраны бейсенбі күні Amazon компаниясының орбиталық спутниктік топтамасына арналған 29 интернет спутнигін орбитаға сәтті шығарды. Бұл туралы зымыран тасығышты әзірлеген United Launch Alliance (ULA) компаниясы хабарлады.
Бірінші сатысы Ресейде өндірілген РД-180 негізгі қозғалтқышымен жабдықталған зымыран АҚШ-тың Флорида штатындағы Канаверал мүйісінде орналасқан Ғарыш күштерінің 41-ұшыру кешенінен АҚШ-тың шығыс жағалауы уақытымен сағат 00:30-да (Мәскеу уақытымен 07:30) ұшырылды. Ұшырылғаннан кейін шамамен бір сағат өткен соң спутниктер белгіленген орбитаға шығарылды.
Amazon Leo (бұрынғы атауы – Kuiper) жобасы аясында өткен жылдың сәуір айының соңынан бері 590, 610 және 630 шақырым биіктіктегі орбиталарға спутниктердің 14 легі орналастырылды. Соңғы ұшырылымды қоса есептегенде, топтамадағы спутниктер саны 369-ға жетті. Бұған дейін, 2023 жылы компания KuiperSat-1 және KuiperSat-2 сынақ спутниктерін ұшырған болатын.
2027–2028 жылдары Amazon компаниясының толыққанды спутниктік жүйесі әлем бойынша кең жолақты интернет қызметін көрсетуге арналған 3276 ғарыш аппаратынан тұруы тиіс.
Amazon Leo/Kuiper жобасы SpaceX компаниясының Starlink спутниктік жүйесінің тікелей бәсекелесі саналады. Қазіргі уақытта Starlink орбитада Жер шарының кез келген нүктесінде интернет қызметін көрсетуге қабілетті 9,3 мыңнан астам спутникті пайдаланып отыр.
Amazon компаниясының мәліметінше, жобаның жалпы құны 10 млрд АҚШ долларынан асады. Жоспар бойынша, 2026 жылдың ортасына қарай спутниктік топтаманың жартысы орбитаға шығарылуы тиіс.
