Ереван. 2 шілде. ИНТЕРФАКС – Еуропалық одақ Арменияға қатысты автономды сауда шараларын енгізуді жоспарлап отыр. Бұл шамамен армян экспортының 80 пайызын ырықтандыруға мүмкіндік береді, деп мәлімдеді Еурокомиссия төрағасы Урсула фон дер Ляйен.
«Армения әлі де Ресей тарапынан елеулі экономикалық қысым көріп отырғанын білемін (…). Бірақ серіктестеріміз қысымға ұшыраған кезде Еуропалық одақ әрдайым қолдау көрсетуге дайын. Бүгін мен екі шара туралы жариялағым келеді», – деді фон дер Ляйен бейсенбі күні Ереванда Армения премьер-министрі Никол Пашинянмен бірлескен брифингте.
Оның айтуынша, жақын арада Армения сауданы нығайтуға және әртараптандыруға бағытталған 52 млн еуролық көмек пакетінің қалған 18 млн еуросын алады.
«Бұл қаржы экспортты ілгерілету агенттігін құруға көмектесуі мүмкін. Екіншіден, біз автономды сауда шараларын енгізуді ұсынып отырмыз. Бұл шаралар армян экспортының шамамен 80 пайызын Еуропалық одақ нарығында ырықтандыруға мүмкіндік береді. Яғни сіздердің бізбен арадағы саудаңыздың 80 пайызы бұдан былай баж салығынан босатылады», – деді фон дер Ляйен.
Оның сөзінше, осының арқасында қазір негізінен Ресей нарығына бағытталған тауарлар Еуропалық одақтың бірыңғай нарығына шығарылмақ.
«Бұл шара Арменияның Ресейге экспортталып келген жаңа ауыл шаруашылығы өнімдерінің, көкөністерінің, жемістерінің және өсімдік тектес тауарларының шамамен 99 пайызына Еуропа нарығын ашады. Сондай-ақ Арменияның сусындар мен алкоголь өнімдері экспортының 90 пайыздан астамы үшін ЕО-ның бірыңғай нарығына жол ашылады», – деді Еурокомиссия басшысы.
«Бұл – тек бастамасы. Жаңа шаралардың көмегімен сіздерде экспортты жедел әртараптандыруға мүмкіндік пайда болады. Шілде айының ортасында біз Арменияға сарапшылар жібереміз. Олар сіздердің өндірушілеріңізбен, кәсіпорындарыңызбен және экспорттаушыларыңызбен тікелей жұмыс істеп, ЕО-мен артықшылықты әріптестіктің барлық мүмкіндігін пайдалануға көмектеседі», – деді Урсула фон дер Ляйен.
