Астана. 10 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев пен Америка Құрама Штаттарының Президенті Дональд Трамп телефон арқылы сөйлесті. Бұл туралы жұма күні Ақорданың баспасөз қызметі хабарлады.
Әңгіме барысында Қасым-Жомарт Тоқаев Дональд Трампты АҚШ тәуелсіздігінің 250 жылдығымен құттықтап, салыстырмалы түрде қысқа тарихи кезең ішінде елдің әлемдегі жетекші державалардың біріне айналғанын атап өтті.
«Қазақстан Президенті АҚШ әкімшілігінің ішкі саяси бағытының негізіне айналған парасатты саясат өз мәні жағынан елімізде «Заң және тәртіп» қағидатына сүйене отырып жүзеге асырылып жатқан Әділетті Қазақстанды құру стратегиясымен үндес екенін атап өтті. Осыған байланысты ол Дональд Трамп жүргізіп отырған саясатты қолдайтынын білдірді», – делінген хабарламада.
Ақпаратқа сәйкес, тараптар екіжақты экономикалық ынтымақтастық пен саяси өзара іс-қимыл мәселелері бойынша пікір алмасты.
Қасым-Жомарт Тоқаев өткен жылдың қараша айында Вашингтонға жасаған сапары барысында қол жеткізілген маңызды келісімдердің табысты жүзеге асырылып жатқанын атап өтті.
Мемлекет басшысы сондай-ақ ядролық қару мен жоғары байытылған уранның таралуына жол бермеу жөніндегі Қазақстанның ұстанымы өзгермейтінін растады. Сонымен бірге халықаралық бақылау тетігін нығайту мақсатында Атом энергиясы жөніндегі халықаралық агенттікпен (МАГАТЭ) ынтымақтастықтың маңызын атап өтті.
Әңгіме барысында АҚШ сенаторы Стив Дэйнспен, АҚШ президентінің арнайы өкілі Серджио Гормен, сондай-ақ Ақ үй мен америкалық іскер топтардың басқа да жоғары лауазымды өкілдерімен Астанада өткен жуырдағы кездесулер мен келіссөздерге оң баға берілді.
Сөз соңында Қасым-Жомарт Тоқаев Дональд Трампты өзіне қолайлы уақытта Қазақстанға ресми сапармен келуге шақырды.
