Астана. 13 шілде. ИНТЕРФАКС-ҚАЗАҚСТАН – Қазақстан Үкіметі Астананың инженерлік және энергетикалық желілерін дамытуға өз резервінен 16,2 млрд теңгеден астам қаржы бөлді. Бұл туралы дүйсенбі күні Үкіметтің баспасөз қызметі хабарлады.
Қаражат Мемлекет басшысының елордадағы коммуналдық инфрақұрылымды жаңғырту жөніндегі тапсырмаларын орындау аясында бөлінді.
«Жобаларды іске асыру елордада тұрғын үй құрылысының қарқынды жүруі мен халық санының артуы жағдайында су бұру, жылу және электрмен жабдықтау жүйелерінің сенімді әрі үздіксіз жұмысын қамтамасыз етуге мүмкіндік береді», – делінген хабарламада.
Жалпы қаржының 8,7 млрд теңгесі су бұру жүйесінің нысандарын салу мен жаңғыртуға бағытталады. Атап айтқанда, елорданың Есіл ауданындағы қолданыстағы тазарту құрылыстарынан Ақмола облысындағы Қарабидайық көліне дейін тартылған кәріз коллекторын қайта жаңарту көзделген.
Сонымен қатар, Ұлы Дала, Хусейн бен Талал, Шыңғыс Айтматов көшелері және Тұран даңғылы бойымен Есіл өзеніне дейін тазартылған ағын суларды бұруға арналған су ағызу коллекторы салынады.
«Жоспарланған жұмыстардың нәтижесінде су жиналатын аумағы 4,5 мың гектарды қамтитын аумақта жерүсті және дренаж суларының сенімді ағызылуы қамтамасыз етіледі. Сондай-ақ тәулігіне шамамен 70 мың текше метр ағын суды тазартатын құрылыстардың тұрақты жұмысына жағдай жасалады. Бұл елорданың одан әрі дамуына қажетті инженерлік инфрақұрылымды қалыптастырады», – деп атап өтті Үкіметтің баспасөз қызметі.
Тағы 7,5 млрд теңге Астананың энергетикалық инфрақұрылымын дамытуға бөлінеді. Бұл қаражатқа қолданыстағы электр желілеріне қосылатын 110/20 кВ «Қарлығаш» жабық қосалқы станциясы салынып, «Астана-Энергия» АҚ-ның ЖЭО-2-дегі №1 турбоагрегаты жаңғыртылады.
Жаңа энергетикалық нысан пайдалануға берілгеннен кейін «Ишим» және «Бәйтерек» қосалқы станцияларына түсетін жүктеме азайып, «Нұрлы жол» вокзалы ауданы мен Тельман тұрғын алабының шамамен 80 мың тұрғыны тұрақты электрмен қамтамасыз етіледі. Бұдан бөлек, қосымша қуат жаңа әлеуметтік нысандарды, соның ішінде мектептер мен емханаларды пайдалануға енгізуге мүмкіндік береді.
Сондай-ақ ЖЭО-2-дегі турбоагрегатты жаңғырту нәтижесінде оның электр қуаты 80 МВт-тан 110 МВт-қа дейін, яғни 30 МВт-қа артады. Бұл елордадағы электр энергиясын тұтыну көлемінің жыл сайынғы өсуін ескере отырып, энергиямен жабдықтау жүйесінің сенімділігін арттыруға мүмкіндік береді.
