АСТАНА. 5 қыркүйек. ИНТЕРФАКС-ҚАЗАҚСТАН — Мемлекет басшысы Қасым-Жомарт Тоқаев сенбі күні «Қазақстан Республикасы вице-президентінің өкілеттіктері туралы» жарлыққа қол қойды.
Мемлекет басшысының баспасөз қызметі таратқан жарлық мәтініне сәйкес, вице-президент мемлекеттің ішкі және сыртқы саясаты бойынша стратегиялық бастамаларды әзірлеп, Президентке ұсынады.
Сонымен қатар Президенттің тапсырмасы бойынша вице-президент Құрылтаймен, Үкіметпен және өзге де мемлекеттік органдармен, сондай-ақ саяси партиялармен, қоғамдық бірлестіктермен және халықаралық ұйымдармен өзара іс-қимыл барысында Мемлекет басшысының атынан өкілдік етеді. Президенттің тапсырмасымен халықаралық іс-шараларға қатысады.
Вице-президент Әлемдік және дәстүрлі діндер көшбасшылары съезінің хатшылығын басқарады. Бұған дейін бұл міндет Парламент Сенатының төрағасына жүктелген болатын.
Сондай-ақ вице-президент Президент жанындағы Қазақстанның стратегиялық зерттеулер институтының қызметіне жетекшілік етеді.
Бұдан бөлек, ол Мемлекеттік наградалар жөніндегі комиссияның, Азаматтық мәселелері жөніндегі комиссияның, Мемлекеттік рәміздер және ведомстволық әрі оларға теңестірілген өзге де наградалардың геральдикасы жөніндегі республикалық комиссияның, Шетелде кадрлар даярлау жөніндегі республикалық комиссияның, Әл-Фараби атындағы ғылым мен техника саласындағы Қазақстан Республикасының Мемлекеттік сыйлығын беру жөніндегі комиссияның, Абай атындағы әдебиет пен өнер саласындағы Қазақстан Республикасының Мемлекеттік сыйлығын беру жөніндегі комиссияның және Жастар саясаты жөніндегі кеңестің жұмысын қамтамасыз етеді.
Жарлықта вице-президенттің «Президенттің тапсырмаларына сәйкес өзге де өкілеттіктерді жүзеге асыратыны» көрсетілген.
Жарлықта белгіленген міндеттерді орындау үшін вице-президент өкімдер шығаруға, өз құзыретіне кіретін мәселелер бойынша орталық және жергілікті атқарушы органдарға тапсырма беруге, Құрылтайдың, Үкіметтің, Халық Кеңесінің және Президент жанындағы консультативтік-кеңесші органдардың отырыстарына қатысуға құқылы.
Сонымен қатар вице-президент өз құзыретіне қатысты мәселелер бойынша мемлекеттік органдар мен лауазымды тұлғалардан қажетті ақпаратты, құжаттар мен басқа да материалдарды сұратуға және алуға құқылы. Сондай-ақ өз құзыретіне кіретін мәселелер бойынша Президент актілерінің жобаларын әзірлеу және Мемлекет басшысы жүктеген өзге де міндеттерді орындау үшін ведомствоаралық жұмыс топтарын құра алады.
Қазақстанда референдумда қабылданған жаңа Конституция 2026 жылғы 1 шілдеде күшіне енді. Оның негізгі жаңалықтарының бірі — Қазақстан вице-президенті лауазымының енгізілуі. Өткен дүйсенбіде бұл қызметке Ерлан Қарин тағайындалды.
