Дубай. 20 шілде. ИНТЕРФАКС – Иранның Сыртқы істер министрі Аббас Аракчи ел әскери майданда стратегиялық басымдыққа қол жеткізгеннен кейін ғана АҚШ-пен қақтығысты келіссөз арқылы реттеу мүмкіндігін қарастыруы ықтимал екенін мәлімдеді.
«Соғысты аяқтаудың екі жолы бар: толық әскери жеңіске жету немесе келіссөздер жүргізу. Келіссөз бастау үшін ең қолайлы сәт – майданда сенімді тактикалық әрі стратегиялық нәтижелерге қол жеткізген кез», – деді Аракчи IRNA агенттігіне берген сұхбатында. Оның сөзін Al Jazeera телеарнасы келтірді.
Басылымның мәліметінше, министр Иран АҚШ-пен әскери текетіресті майдандағы басымдығын қамтамасыз еткеннен кейін ғана тоқтатуға дайын екенін айтқан.
Оның пікірінше, әскери іс-қимылдарды тоқтатып, келіссөздерге қашан көшу керектігін дұрыс айқындау – ең маңызды мәселе.
«Адамдардың өмірі мен ел тағдырын тәуекелге тігуге болмайды. Барлық шешім нақты әрі жан-жақты есепке сүйене отырып қабылдануы тиіс», – деді Аракчи.
Бұған дейін дүйсенбі күні АҚШ Қарулы күштерінің Таяу Шығыстағы орталық қолбасшылығы (CENTCOM) америкалық әскер Иран аумағына тоғызыншы түн қатарынан соққы жасағанын хабарлаған болатын.
Ал АҚШ мемлекеттік хатшысы Марко Рубио Вашингтонның Иранмен арадағы қақтығысты дипломатиялық жолмен реттеуге әлі де ашық екенін мәлімдеді.
