Қаржылық мониторинг агенттігінің мәліметінше, Түркістанда ұйымдасқан қылмыстық топтың 27 мүшесі 3 млрд теңгеден астам бюджет қаражатын жымқырғаны үшін сотталды. Әрқайсысына қылмыстағы рөліне қарай 6 жылдан 8 жылға дейін бас бостандығынан айыру жазасы тағайындалды. ҚМА-ның Түркістан облысы бойынша департаменті 2016–2021 жылдар аралығында «КТ Яссы Несие» ЖШС басшылығы агробизнесті қолдау бағдарламасы аясында ірі қара мал сатып алуға бөлінген «Аграрлық несие корпорациясы» АҚ қаражатын жымқырудың заңсыз схемасын ұйымдастырғанын анықтады. Несие алу үшін жалған тұлғалардың атына шаруа қожалықтары мен жеке кәсіпкерлер тіркелген. Ал несие өтінімдеріне қолдан жасалған бизнес-жоспарлар, жалған құқық белгілейтін құжаттар және іс жүзінде жоқ кепіл мүлкі қоса ұсынылған. Тергеу барысында 33 қылмыстық құқық бұзушылық фактісі анықталды. Барлығы 24 жалған несие рәсімделіп, кепіл ретінде шын мәнінде жоқ 54 нысан көрсетілген. Сот шешімімен мемлекет кірісіне 19 тұрғын үй, 10 жер учаскесі, 2 пәтер, 4 коммерциялық нысан және 4 автокөлік тәркіленді. Үкім заңды күшіне енген жоқ.
Еуразия24 пікірі:
Қазақстанда агроөнеркәсіп кешенін қолдауға бөлінетін мемлекеттік қаражаттың жұмсалуына тұрақты түрде бақылау жүргізіледі. Мәселен, 2021 жылы Сыбайлас жемқорлыққа қарсы қызметтің Сотқа дейінгі тергеп-тексеру қызметінің сол кездегі басшысы Асхат Жұмағали аграрлық секторға бөлінген субсидияларды жымқыру деректері бойынша 54 қылмыстық іс тергеліп жатқанын мәлімдеген еді. Ал 2026 жылғы қаңтарда Қаржы министрлігі Премьер-министрге агроөнеркәсіп кешенінде жалпы сомасы 300 млрд теңгеге жуық жүйелі заңбұзушылық анықталғаны туралы баяндады. Оның ондаған миллиард теңгесі мемлекетке тікелей келтірілген шығын ретінде бағаланған. Бұл жағдайлардың барлығына жалған есептер жасау, көрсеткіштерді қолдан көбейту және түрлі көлеңкелі схемаларды пайдалану тән. Яғни агроөнеркәсіп кешеніндегі жасанды «жетістіктердің» тәсілі жылдар бойы айтарлықтай өзгерген жоқ. Дегенмен мұндай заңсыз әрекеттерді ұйымдастырушылар жауапкершіліктен тыс қалып жатқан жоқ. Кейбіреулер мемлекет қаржысынан заңсыз пайда табу үшін бас бостандығынан айырылу қаупіне де барады. Мұны батылдық деу қиын, ақылға қонымды әрекет деуге де келмейді. Бірақ бір нәрсе анық: бюджет қаражатын жымқыру әрекеттеріне мемлекет қатаң тосқауыл қойып, экономикалық қылмыстарға мүлдем төзбеушілік қағидатын ұстанып келеді.
