«Әділет» партиясы сайлауға «Әділетті болашақ үшін» атты сайлауалды бағдарламасымен қатысады. Құжатта елді дамытудың жеті стратегиялық мақсаты мен он басым бағыты айқындалған. Олар: «Заң және тәртіп», «Тиімді институттар», «Қуатты өңір – қуатты ел», «Цифрлық мемлекет», «Әділетті әрі бәсекеге қабілетті экономика», «Әлеуметтік ынтымақ пен атаулы қолдау», «Адами капиталды дамыту», «Жаңа мәдениетті қалыптастыру және ұлтты ұйыстыру», «Таза Қазақстан» және «Жауапты орта держава». Партия өкілдерінің айтуынша, сайлауалды бағдарлама нақты іс-қимылдарға, айқын жоспарлар мен дәйекті шешімдерге негізделген кешенді құжат болып табылады. Оның өзегіне уақыт сынынан өткен, тәжірибеде дәлелденген әрі қоғам қолдауына ие болған құндылықтар арқау болған. «Бағдарламамыздың басты құндылығы – адам, оның әл-ауқаты, отбасы және лайықты өмір сүруге жағдай жасау. Біз бүгінгі мәселелерді уақытша шешуге емес, елдің ұзақ мерзімді әрі жүйелі дамуына басымдық береміз. Бағдарламаны әзірлеуге азаматтардың өзі тікелей қатысып, олардың ұсыныстары мен бастамалары осы құжаттың негізіне айналды», – деді Айбек Дәдебай.
Еуразия24 пікірі:
Қазақстанда Құрылтай сайлауының науқаны басталды. Енді саяси партиялардың сайлаушыларға қандай жаңа бастамалар ұсынатыны қызығушылық тудырады. Мәселен, біз «Әділет» партиясының сайлауалды бағдарламасын зерделеп шықтық. Құжаттағы дәстүрлі сайлауалды уәделерден ерекшеленетін ең маңызды бастамалар мыналар:
- AI-Sana – 5 миллион азаматты жасанды интеллект негіздеріне оқыту. Сонымен қатар мектептерде жасанды интеллект технологияларын енгізу және жоғары оқу орындарының барлық студенттері үшін AI-Sana курсын міндетті пәнге айналдыру;
- CryptoCity және Exponential Cluster – криптовалюта мен блокчейн жобаларына арналған CryptoCity арнайы реттеу аймағын және EXPO аумағында Exponential Cluster DeepTech кластерін құру;
- Құрылыс саласындағы цифрлық теңге – үлестік тұрғын үй құрылысы кезінде барлық есеп айырысуды цифрлық теңге арқылы жүргізу. Бұл үлескерлер қаржысының мақсатты жұмсалуын ашық бақылауға мүмкіндік береді;
- Жасанды интеллектке негізделген антифрод жүйесі – телефон алаяқтарын әңгіме басталған алғашқы секундтарда анықтайтын ұлттық жүйені іске қосу;
- «Цифрлық әмиян» – азаматтарға өздерінің жеке деректеріне қолжетімділікті өздері басқарып, рұқсат беруге мүмкіндік беретін жеке цифрлық кеңістік қалыптастыру;
- Сағаттық ең төменгі жалақы және ЖИ-сараптама – платформалық жұмыспен қамтылған азаматтар үшін сағаттық ең төменгі жалақы енгізу, сондай-ақ мүгедектікті белгілеу кезінде жасанды интеллект мүмкіндіктерін пайдалану;
- Салық және ипотека – жалақыдан ұсталатын салықтарды автоматты түрде есептеу және отбасылар үшін ипотекалық пайыздар бойынша салықтық шегерімді қайта енгізу.
