Астана. 23 тамыз. ИНТЕРФАКС-ҚАЗАҚСТАН – Шетелде уақытша жүрген Қазақстан азаматтары жексенбі күні Құрылтай – елдің жаңа бір палаталы парламенті депутаттарын сайлауға дауыс бере бастады, деп хабарлады Қазақстан Сыртқы істер министрлігінің баспасөз қызметі.
СІМ мәліметінше, Жапонияның Токио қаласындағы №425 және Корея Республикасының Сеул қаласындағы №422 сайлау учаскелері жергілікті уақыт бойынша сағат 07:00-де ашылып, шетелдегі дауыс беруді алғашқылардың бірі болып бастады.
Сонымен қатар Малайзия, Сингапур, Индонезия және Вьетнамдағы сайлау учаскелері де жұмысын бастады.
Қазақстан азаматтарының шетелде дауыс беруі үшін 61 мемлекеттегі 79 дипломатиялық өкілдікте сайлау учаскелері құрылған.
Құрылтай 145 депутаттан тұрады. Олар бүкіл ел аумағын қамтитын бірыңғай жалпыұлттық сайлау округі бойынша пропорционалды жүйемен сайланады. Сайлаушылар саяси партиялар ұсынған тізімдерге дауыс береді.
Орталық сайлау комиссиясы сайлауға қатысу үшін жеті саяси партиядан барлығы 545 кандидатты тіркеді. «Әділет» партиясынан – 186, «Ақ жолдан» – 63, «Ауылдан» – 69, «Байтақтан» – 47, Қазақстан Халық партиясынан – 72, Жалпыұлттық социал-демократиялық партиядан – 33 және Respublica партиясынан 75 кандидат ұсынылған.
Құрылтай депутаттары жалпыға бірдей, тең және төте сайлау құқығы негізінде жасырын дауыс беру арқылы сайланады. Депутаттардың өкілеттік мерзімі – бес жыл. Құрылтайдан орын алу үшін партиялар бірыңғай жалпыұлттық сайлау округіндегі дауыс беру қорытындысы бойынша 5 пайыздық межеден өтуі тиіс.
Қазақстанда заң шығару билігін жүзеге асыратын жоғары өкілді орган – Құрылтай алғаш рет сайланып отыр. Бұған дейін елде Мәжіліс пен Сенаттан тұратын екі палаталы Парламент жұмыс істеді.
