Астана. 23 тамыз. ИНТЕРФАКС-ҚАЗАҚСТАН – Қазақстанның 61 елдегі шетелдік мекемелері жанынан ашылған 79 сайлау учаскесінің барлығы жұмысын бастады. 11 мемлекетте дауыс беру аяқталды. Бұл туралы Орталық сайлау комиссиясының баспасөз қызметі Қазақстан Сыртқы істер министрінің орынбасары Арман Исетовке сілтеме жасап хабарлады.
«Астана уақыты бойынша сағат 19:00-дегі жағдайға сәйкес, Қазақстанның 61 елдегі шетелдік мекемелері жанындағы 79 сайлау учаскесінің барлығы ашылды. 11 мемлекетте дауыс беру аяқталды», – деді Исетов.
Шетелдегі сайлаушылар тізіміне 11 402 азамат енгізілген. Оның 6 007-сі дауыс беріп үлгерді.
«Ең соңғы болып АҚШ-тың Сан-Франциско қаласындағы отандастарымыз дауыс береді. Ондағы сайлау учаскесі Астана уақытымен сағат 19:00-де ашылды», – деді министрдің орынбасары.
Шетелдегі учаскелік сайлау комиссиялары дауыс беру қорытындысы бойынша хаттамаларды әзірлеп, жалпы нәтижені шығару үшін Орталық сайлау комиссиясына дереу жолдайды.
Астана уақыты бойынша сағат 18:00-де Оңтүстік Корея, Жапония, Қытай, Сингапур, Малайзия, Моңғолия, Индонезия, Таиланд және Вьетнамдағы сайлау учаскелері жұмысын аяқтаған.
Жексенбі күні Қазақстанда жаңа бір палаталы парламент – Құрылтай депутаттарының алғашқы сайлауы өтіп жатыр. Елде және шетелде 10,4 мыңнан астам сайлау учаскесі жұмыс істейді. Оның 79-ы Қазақстанның 61 мемлекеттегі шетелдік өкілдіктері жанынан ашылған.
