Астана. 23 тамыз. ИНТЕРФАКС-ҚАЗАҚСТАН – Қазақстанда дауыс беру күні үгіт жүргізуге қатысты талапты бұзудың бір дерегі тіркелді. Алматы тұрғыны толтырылған сайлау бюллетенін жариялағаны үшін әкімшілік жауапқа тартылды. Бұл туралы Қазақстан Бас прокуроры аппаратының БАҚ мониторингі және қоғаммен байланыс басқармасының бастығы Ерлан Жанпейсов хабарлады.
Жанпейсов жексенбі күні өткен жалпыұлттық онлайн-марафон барысында: “Бүгін кез келген үгіт-насихатқа тыйым салынған. Толтырылған бюллетеньді фотоға немесе видеоға түсіріп, оны тарату да үгіт болып саналатыны бірнеше рет ескертілді. Соған қарамастан, бүгін осындай заң бұзушылық анықталды. Алматы тұрғынына қатысты Қазақстан Республикасының Әкімшілік құқық бұзушылық туралы кодексінің 102-бабы – сайлау алдындағы үгітке тыйым салынған кезеңде оны жүргізу бойынша әкімшілік шара қолданылды”, – деді.
Оның айтуынша, Алматы тұрғыны кінәсін мойындап, жариялаған жазбасын өшірген.
Әкімшілік құқық бұзушылық туралы кодекстің 102-бабына сәйкес, жеке тұлғаларға 15 айлық есептік көрсеткіш көлемінде айыппұл салынады. Қазақстанда бір АЕК 4 325 теңгені құрайды.
«Қазіргі уақытта дауыс беру қалыпты жағдайда өтіп жатыр. Сайлауға қатысты прокуратура органдарына ешқандай өтініш түскен жоқ. Соттарға да талап арыздар берілмеді», – деді Бас прокуратура өкілі.
Қазақстан ІІМ-нің ресми өкілі Шыңғыс Әлекешев те елдегі жағдай тұрақты екенін, қоғамдық тәртіпті өрескел бұзу деректері тіркелмегенін мәлімдеді.
«Ішкі істер министрлігі күні бойы еліміздің барлық өңіріндегі жағдайды нақты уақыт режимінде бақылап отыр. Бұл үшін ІІМ жедел басқару орталықтарының мүмкіндіктері пайдаланылуда», – деді ол.
Әлекешевтің айтуынша, көшелер, қоғамдық орындар және сайлау учаскелеріне іргелес аумақтар бейнебақылау камералары арқылы тұрақты бақылауда. Қалалық және аудандық полиция бөлімдерінде кез келген хабарламаға жедел әрекет етуге дайын мобильді топтар жұмыс істеп жатыр.
«Жағдай жергілікті жерлерде де, цифрлық жүйелер арқылы да үздіксіз бақылауда», – деді ІІМ өкілі.
Жексенбі күні Қазақстанда жаңа бір палаталы парламент – Құрылтай депутаттарының алғашқы сайлауы өтіп жатыр. Дауыс беру 10,4 мыңнан астам сайлау учаскесінде ұйымдастырылған. Оның ішінде Қазақстанның 61 мемлекеттегі өкілдіктері жанынан ашылған 79 учаске бар.
