Берлин. 27 тамыз. ИНТЕРФАКС – Босния сербтері армиясын басқарған Ратко Младич 85 жасқа қараған шағында қайтыс болды. Бұл туралы бейсенбі күні Сербияның РТС телеарнасы хабарлады.
Младич Гаагада өмір бойына бас бостандығынан айыру жазасын өтеп келген. Ол бірнеше рет инсульт алғаннан кейін денсаулығына байланысты Сербияда емделуге рұқсат сұраған. Алайда өтініші қанағаттандырылмады. Оны еліне қайтарып, емдетуге рұқсат беру жөнінде туыстары да бірнеше рет өтініш жасаған. Олардың қатарында ұлы Дарко да бар.
Бірнеше күн бұрын Сербия президенті Александр Вучич те халықаралық сот органдарына осы мәселе бойынша жүгінді. Ол Младичтің денсаулығын ескеріп, жазадан босатуды және Сербияға қайтаруға рұқсат беруді сұрады. Алайда бұл өтініш те қабылданбады.
Ратко Младичтің әскери қызметі 1965 жылы сол кездегі Югославия құрамындағы Македония Социалистік Республикасының астанасы Скопьеде басталды. 1991 жылы ол алдымен Приштинаға, кейін аймақтағы жағдайдың шиеленісуіне байланысты Книнге жіберілді. Хорватия аумағындағы бұл қала кейін өзін-өзі жариялаған Серб Краинасы Республикасының астанасы болды.
1992 жылы Босния және Герцеговинада азаматтық соғыс басталған соң Младич Серб Республикасы армиясының қолбасшысы болып тағайындалды. Босниядағы сербтер құрған бұл республика Югославиядан бөлінуді мойындамаған еді. Младич басқарған армияның сол жылдардағы әрекеттерінің бірі кейін Сребреница маңындағы мұсылман халықты қырып-жоюға қатысты оған тағылған геноцид айыбына негіз болды.
Нидерланд бітімгерлері Сребреницадан кеткен соң, 1995 жылғы 11 шілдеде қаланы Босния сербтерінің әскері басып алды. Бұрынғы Югославия жөніндегі халықаралық трибуналдың мәліметінше, содан кейін 7 мыңнан 8 мыңға дейін мұсылман өлтірілген.
1995 жылғы 25 шілдеде Бұрынғы Югославия жөніндегі халықаралық трибунал Младичке геноцид және адамзатқа қарсы қылмыс жасады деген айып тақты. Ол 2011 жылғы 26 мамырда Сербияда ұсталып, кейін Гаагадағы халықаралық сотқа тапсырылды.
2017 жылғы 22 қарашада Гаага трибуналы Младичті Босния және Герцеговинадағы 1992–1995 жылдардағы соғыс кезінде жасаған қылмыстары үшін өмір бойына бас бостандығынан айырды. 2021 жылғы 8 маусымда апелляциялық инстанция үкімді өзгеріссіз қалдырды. Содан бері ол Нидерландтағы Схевенинген түрмесінде жазасын өтеп келді.
2026 жылғы 10 сәуірде Младич тағы да инсульт алған. Одан кейін денсаулығы оңалмады. Оның жағдайын неврологиялық, жүрек-қан тамырлары және бүйрек аурулары да ауырлата түскен.
Сербиялық дәрігерлер тобы Младичті Гаагадағы түрме ауруханасында тексеріп, денсаулығына қатысты медициналық қорытынды әзірлеген. Дәрігерлер де оны Сербияға қайтарып, сол жерде емдеуге мүмкіндік беру туралы өтініш жасаған.
