Рим. 27 тамыз. ИНТЕРФАКС – Сербия президенті Александр Вучич сербиялық NIS мұнай компаниясының алдағы тағдырына қатысты келіссөздердің нәтижелі аяқталатынына үміт білдірді.
«Алғаш рет оң нәтиже болады деген сенім пайда болды. Қыркүйекте NIS бойынша келіссөздерді аяқтай аламыз деп үміттенемін», – деп келтіреді оның сөзін бейсенбіде Сербияның РТС телерадиоарнасы.
Вучич бұл мәселені АҚШ тарапы мен АҚШ Қаржы министрлігінің Шетелдік активтерді бақылау басқармасының (OFAC) ұстанымын ескермей шешу мүмкін емес екенін атап өтті.
Бұған дейін OFAC венгриялық MOL компаниясына ресейлік «Газпром нефтьпен» NIS компаниясын сатып алу-сату жөнінде келіссөз жүргізуге мүмкіндік беретін лицензияның мерзімін 28 тамызға дейін ұзартты.
Осыған дейін мұндай лицензия 31 шілдеге дейін жарамды болған.
РТС бұған дейін OFAC NIS компаниясының қалыпты жұмысын жалғастыруына мүмкіндік беретін арнайы лицензияны да 28 тамызға дейін ұзартқанын хабарлаған.
Бұрын хабарланғандай, MOL «Газпром нефтьпен» NIS компаниясының 56,15% үлесін сатып алу жөнінде келісімге келген. Кейін венгриялық компания NIS-тегі акцияларының бір бөлігін БАӘ-нің ADNOC компаниясына сатуы мүмкін. Сонымен қатар алдағы уақытта Сербияның NIS-тегі үлесін тағы 5 пайыздық тармаққа ұлғайту мүмкіндігі қарастырылған.
Қазіргі кезде NIS-тің негізгі акционері – «Газпром нефть», оның үлесі 44,85%-ды құрайды. Тағы 11,3% акция «Газпром капитал» ЖШҚ басқаруындағы «Интэлидженс» АҚ-ға тиесілі. «Газпром» NIS-тің бір акциясына тікелей иелік етеді. Сербия мемлекетінің үлесі – 29,87%. Бұдан бөлек, компанияның миноритарлық акционерлері бар.
2025 жылдың басында «Газпром нефтьтің» еншілес компаниясы саналатын NIS АҚШ-тың SDN санкциялық тізіміне енгізілді. Сол кезде Вучич Вашингтон компания капиталынан ресейлік тараптың толық шығуын талап етіп отырғанын мәлімдеген.
NIS – Сербияда көмірсутек шикізатын барлау және өндірумен айналысатын жалғыз компания. Оған Панчево қаласындағы жылына 4,8 млн тонна мұнай өңдеуге қауқарлы зауыт та тиесілі. Компания Сербияның мұнай өнімдері нарығында жетекші орын алады. Оның жанармай құю станциялары көршілес Балқан елдерінде де жұмыс істейді, жалпы саны 400-ден асады.
