Хельсинки. 27 тамыз. ИНТЕРФАКС – Финляндияда 2024 жылғы желтоқсанда Фин шығанағындағы суасты кабельдерін зақымдады деген күдікке ілінген Eagle S танкеріне қатысты сот ісі қайта жалғасады. Кеме сол кезде Ресейден шыққан мұнай өнімдерін тасымалдаған.
Бейсенбі күні Хельсинки апелляциялық соты бұған дейін аудандық сот шығарған шешімнің күшін жойып, істі қайта қарауға жіберді, деп хабарлайды Yle телерадиокомпаниясы. Апелляциялық соттың бұл шешімі әлі түпкілікті емес, оған Жоғарғы сотқа шағым беруге болады.
2025 жылғы қазанда Хельсинки аудандық соты бұл істі қарау Финляндия соттарының құзыретіне жатпайды деген қорытындыға келген еді. Осыған байланысты сот ауыр зардап келтіру және телекоммуникация жұмысына елеулі кедергі жасау жөніндегі айыптарды, сондай-ақ келтірілген шығынды өтеу туралы талаптарды қараусыз қалдырды.
Кук аралдарының туымен жүрген Eagle S танкері 2024 жылғы желтоқсанда Фин шығанағындағы электр және телекоммуникация кабельдерін зақымдады деген күдікке ілінді. Фин тарапының мәліметінше, кемеде Ресейден жеткізілген 35 мың тонна бензин болған. Оның құны 20 млн еуроға бағаланған.
Сот барысында прокурор телекоммуникация желілерін істен шығарғаны үшін Eagle S капитаны мен оның аға көмекшісін 2,5 жылға бас бостандығынан айыруды сұрады. Алайда аудандық сот БҰҰ-ның Теңіз құқығы жөніндегі конвенциясына сүйеніп, бұл істі Финляндияның қылмыстық соты қарай алмайды деген шешімге келген. Енді апелляциялық сот аталған конвенция Финляндияның мұндай қылмыстық істерді қарауына кедергі келтірмейді деген қорытынды шығарды.
Финляндия бас прокурорының орынбасары Юкка Раппе Yle-ге берген пікірінде бұл шешімнің қыркүйекте қаралатын Fitburg жүк кемесіне қатысты іс үшін де маңызы зор екенін айтты.
Fitburg 2025 жылғы желтоқсанда Ресейде өндірілген болатты Санкт-Петербургтен Израильге тасымалдаған. Сент-Винсент және Гренадин туымен жүрген кемені Ресей азаматы басқарған. Финляндия билігі кеме Фин шығанағында зәкірмен екі суасты телекоммуникация кабелін зақымдады деп күдіктеніп отыр.
