Астана. 28 тамыз. ИНТЕРФАКС-ҚАЗАҚСТАН – Қазақстанда мемлекеттік органдар мен қоғамдық институттарды жаңғырту жұмысы биылғы жылдың соңына дейін жалғасады. Бұл туралы Қазақстан Президенті Қасым-Жомарт Тоқаев мәлімдеді.
«Жалпы, мемлекеттік және қоғамдық институттарды жүйелі түрде жаңғырту жұмысы осы жылдың соңына дейін жалғасады», – деді Тоқаев жұма күні бірінші шақырылымдағы Құрылтайдың алғашқы сессиясын ашу барысында.
Президенттің айтуынша, Құрылтайдың жұмысқа кірісуі мемлекеттік басқару жүйесіндегі ауқымды институционалдық өзгерістердің басталуына жол ашады. Өйткені жаңа заң шығарушы орган билік жүйесін қалыптастыруда маңызды рөл атқарады.
«Атап айтқанда, Конституциялық соттың судьялары, Орталық сайлау комиссиясы мен Жоғары аудиторлық палатаның мүшелері Құрылтайдың келісімімен тағайындалады», – деді Мемлекет басшысы.
Сондай-ақ ол Президенттің ұсынуымен Жоғарғы сот судьяларын қызметке тағайындау және қызметтен босату құқығы депутаттарға берілгенін еске салды. Бұдан бөлек, Құрылтай Конституциялық және Жоғарғы сот судьяларын, сондай-ақ депутаттарды құқықтық иммунитеттен айыру мәселесін шеше алады.
Депутаттар республикалық бюджеттің атқарылуы жөніндегі Жоғары аудиторлық палатаның есебін бекітеді және Конституциялық соттың жыл сайынғы жолдауын тыңдайды.
Сонымен қатар Құрылтай Үкіметке сенімсіздік білдіруге және Үкіметтің жекелеген мүшелерін қызметінен босату жөнінде Президентке ұсыныс енгізуге құқылы.
«Бір сөзбен айтқанда, Құрылтайға атқарушы және сот билігін қалыптастыруға, сондай-ақ ел тағдыры үшін айрықша маңызы бар стратегиялық мәселелерді шешуге қатысты кең өкілеттік берілді», – деді Тоқаев.
Мемлекет басшысының айтуынша, мұның бәрі заң шығарушы органның билік жүйесіндегі ықпалын едәуір арттырып, билік тармақтары арасындағы тежемелік әрі тепе-теңдік тетіктерін күшейтті.
