Арнайы комиссия кәріз құдығында қаза тапқан алты адамның өліміне қатысты тергеуді аяқтады.
«Павлодар облысында «Aqtogai Milk» ЖШС-де болған топтық жазатайым оқиғаны арнайы тергеу аяқталды. Оқиға салдарынан алты жұмысшы қаза тапқан. Тергеу барысында жұмысшылардың бірі кәріз құдығында жұмыс істеп жатқан кезде күкіртсутектің әсеріне ұшырағаны анықталды. Оған көмек көрсетуге ұмтылған өзге жұмысшылар құдыққа кезек-кезек түсіп, әріптестерін құтқаруға тырысқан», — деп хабарлады ҚазТАГ Павлодар облысы еңбек басқармасының басшысы Асқар Қапановқа сілтеме жасап.
Тергеу нәтижесінде, алты жұмысшы да бір-біріне көмектесуге әрекеттенген кезде күкіртсутектен уланып, қаза тапқан. Сондай-ақ олардың қауіптілігі жоғары жұмыстарды қауіпсіз орындау тәсілдеріне тиісті деңгейде үйретілмегені және қажетті жеке қорғаныс құралдарымен қамтамасыз етілмегені анықталды. Біздіңше, қайғылы жағдайдың негізгі себебін осыдан іздеген жөн.
Бұған қоса, үкіметтік комиссия жұмысының қорытындысы бойынша жұмыс беруші — «Aqtogai Milk» ЖШС-нің кінәсі 100% деп белгіленді.
Енді құзырлы органдар жазатайым оқиғаның себептері мен мән-жайын толық анықтады. Жауапты лауазымды тұлғалар да белгілі. Осыдан үш апта бұрын іс бойынша үш күдіктінің ұсталғаны хабарланған еді.
Олардың арасында «Aqtogai Milk» ЖШС-нің бас директоры, Павлодар облыстық мәслихатының депутаты Александр Терентьев те болуы мүмкін. БАҚ 11 тамызда оның ұсталып, уақытша ұстау изоляторына қамалғанын хабарлаған.
Тергеу мүддесіне байланысты өзге мәліметтер әзірге жарияланбай отыр.
Арнайы үкіметтік комиссия жұмысын аяқтағаннан кейін Еңбек министрлігі Қазақстандағы жұмыс берушілерді «қауіптілігі жоғары жұмыстарды, соның ішінде құдықтарда, резервуарларда, сыйымдылықтарда және басқа да тұйық кеңістіктерде атқарылатын жұмыстарды ұйымдастыруға ерекше назар аударуға» шақырды.
Әрине, бұл алты адамның, оның ішінде 17 жастағы мектеп оқушысының өмірін қайтара алмайды. Алайда қылмыстық іс жан-жақты әрі объективті тергеліп, сот әділ шешім шығарса, бұл жағдай бизнес өкілдеріне ащы сабақ болуы мүмкін. Қызметкерлердің еңбек қауіпсіздігіне немқұрайды қарау орны толмас зардапқа әкелуі мүмкін.
