АСТАНА. 6 қыркүйек. ИНТЕРФАКС-ҚАЗАҚСТАН — Марқакөл орман шаруашылығында табиғи өрт шығып, оны сөндіруге орман күзеті мен Төтенше жағдайлар министрлігінің күштері жұмылдырылды. Бұл туралы жексенбі күні Қазақстанның Экология және табиғи ресурстар министрлігінің баспасөз қызметі хабарлады.
«Марқакөл орман шаруашылығы» КММ аумағында құрғақ шөп пен бұта өртенген. Өрт сөндіру жұмыстары жету қиын аумақта жүргізіліп жатыр. Оған орман күзеті мен ТЖМ бөлімшелері жұмылдырылған», — делінген министрлік хабарламасында.
Ведомство мәліметінше, өртті сөндіруге барлығы 83 адам, 10 арнайы техника және екі тікұшақ тартылған.
«Өрт сөндіру жұмыстары жалғасып жатыр. Жағдай тиісті қызметтердің бақылауында», — деп министрлік хабарлады.
Бұған дейін Экология министрлігі Ақмола, Алматы және Солтүстік Қазақстан облыстарында үш орман өрті шыққанын хабарлаған.
