Мәскеу. 21 қыркүйек. ИНТЕРФАКС – Британдық спорттық автокөлік өндіруші McLaren Automotive Ұлыбританиядағы өндірісін ұлғайтып, жаңа модельдер шығаруға 500 млн фунт стерлинг ($675 млн) жұмсамақ. Компания сондай-ақ өз тарихында алғаш рет жол талғамайтын көлік шығаруды жоспарлап отыр.
McLaren мәліметінше, осы қаржыға жаңа көлік құрастыру зауыты салынып, трансмиссиялар мен қозғалтқыштарды компанияның өзінде әзірлеп, шығару жолға қойылады. Жоспар орындалса, 2032 жылға дейін Ұлыбританияда мың жаңа жұмыс орны ашылады.
Компанияның Ұлыбританиядағы өндіріс орындарында еңбек ететін қызметкерлер саны екі есе көбеймек. Сонымен бірге болашақ мамандарды даярлауға арналған жаңа кәсіптік оқыту бағдарламаларына басымдық беріледі, делінген хабарламада.
«Бұл инвестиция компанияның одан әрі өсіп, дамуына және бізді өзгелерден даралайтын артықшылықтарды күшейтуге жол ашады. Біз алдағы ондаған жыл бойы бәсекеге қабілетті болуымызға мүмкіндік беретін мамандарға, технологиялар мен жаңа өнімдерге қаржы саламыз», – деді McLaren-нің бас атқарушы директоры Ник Коллинз.
Қажетті қаржыны McLaren-нің иесі – Абу-Дабидің L’imad мемлекеттік қоры бөледі. Қор биыл жыл басында компанияға алдағы бес жыл ішінде 1,5 млрд фунт салатынын мәлімдеген болатын.
Жол талғамайтын көлік шығару премиум санаттағы автокөлік өндірушілер үшін табысты бағытқа айналған. Bentley-де ең көп сатылатын модель – Bentayga кроссовері. Lamborghini-дің Urus моделі де 2018 жылы сатылымға шыққаннан бері компанияның сауда көрсеткіштерін айтарлықтай арттырды. Ал Ferrari құны шамамен 450 мың еуро тұратын Purosangue кроссоверінің сирек әрі айрықша модель ретіндегі мәртебесін сақтау үшін оны шектеулі көлемде шығарып отыр, деп атап өтеді агенттік.
